Arte

Muzeu Historik Kombëtar, projekte të reja në bashkëpunim me ambasadën kineze

Drejtori i Muzeut Historik Kombëtar, Melsi Labi, priti në një takim zyrtar ambasadoren e Republikës Popullore të Kinës në Shqipëri, Jiang Yu.

Një mundësi e mirë kjo, për të shkëmbyer mendime lidhur me forcimin e marrëdhënieve ndërmjet Muzeut Historik Kombëtar dhe ambasadës te Republikes Popullore të Kinës në fushën e artit, kulturës dhe historisë.

Drejtori Labi u ndje i nderuar që ambasadorja Yu vizitoi për të dytën herë Muzeun Historik Kombëtar në një hark kohor të shkurtër. Ai tha se “Kina dhe Shqipëria përbëjnë dy aspekte përplotësuese të njëra-tjetrës dhe në këtë kontekst, projektet dhe iniciativat e reja që do të vijnë nga ky bashkëpunim do të hapin perspektiva konkrete në fushën e kulturës për të dyja institucionet përfaqësuese. Për të arritur realizimin e të gjitha ide-projekteve që ne kemi, sigurisht që na vijnë në ndihmë marrëdhëniet diplomatike mes dy vendeve, të cilat dëshmojnë jetëgjatësi dhe një miqësi të bazuar në mirëkuptim”.

Gjatë takimit u diskutua për të ardhmen e marrëdhënieve dypalëshe mes dy institucioneve, të cilat priten të intensifikohen, për të kontribuar në njohjen e kulturës dhe traditës kineze nga populli shqiptar. Duke u nisur nga ky synim i përbashkët, ambasada e Republikës Popullore të Kinës në Shqipëri dhe Muzeu Historik Kombëtar së shpejti do të vijnë më një projekt, i cili do të konsistojë në shfaqjen e filmave kinezë për një periudhë kohore, në ambientet e Muzeut Historik Kombëtar. Ambasadorja Jiang Yu shfaqi dëshirën e saj për të intensifikuar marrëdhëniet dhe për të zgjeruar kontaktet midis ambasadës së Republikës Popullore të Kinës dhe Muzeut Historik Kombëtar.

Gjatë fjalës së saj ajo u shpreh se “E kam ndjerë miqësinë për popullin kinez nga populli shqiptar që në fillim të vizitës time në Muzeun Historik Kombëtar, i cili ka qenë dhe institucioni i parë shtetëror që unë kam vizituar dhe për këtë arsye duhet të punojmë edhe më shumë për të forcuar ketë miqësi”.

Related Articles

Leave a Reply

Your email address will not be published. Required fields are marked *

Back to top button