Bilanci i OSHEE 2014: Rriten të ardhurat, ulen shpenzimet, bien ndjeshëm humbjet
2012-a dhe 2013-a ishte periudha më e keqe historike për operatorin e shpërndarjes së energjisë elektrike te klientët fundorë (në atë kohë të quajtur CEZ). Kompania rezultoi me humbje prej gati 67 miliardë lekësh (450 milionë euro) për dy vitet së bashku, të ardhurat ngecën, ndërsa detyrimet ndaj furnitorëve dhe humbjet arritën rekorde. Këto dy vite shënuan dhe periudhën kur qeveria nisi konfliktet dhe më pas bëri “divorc” me operatorin çek të shpërndarjes CEZ, që e kishte blerë operatorin e shpërndarjes së energjisë (75%) në 2008-n nga shteti, por që nuk arriti ta sillte në binarë atë, përkundrazi.
Në 2014-n, kompania, që tashmë quhet Operatori i Shpërndarjes së Energjisë Elektrike (OSHEE) ka përmirësuar ndjeshëm treguesit. Sipas të dhënave nga bilanci, të ardhurat e OSHEE ishin 47.2 miliardë lekë në 2014-n, me një rritje prej 25% me bazë vjetore. Shpenzimet zbritën me 22.5%, në 49.3 miliardë lekë. Kjo bëri që dhe humbjet të reduktoheshin ndjeshëm me 92% në 2.1 miliardë lekë, nga 26 miliardë lekë në 2013-n (shiko tabelën:Pasqyra e të ardhurave dhe shpenzimeve, CEZ Shpërndarje si dhe tabelat e tjera, pjesë nga bilanci).
Për tremujorin e parë 2015, kompania ka deklaruar se ka dalë me një fitim prej 2.1 miliardë lekësh, për herë të parë që prej 2009-s.
Humbjet në rrjet gjithashtu janë reduktuar; ka filluar shlyerja e detyrimeve të prapambetura, ndërsa investimet pritet të zgjerohen ndjeshëm.
