BotaRajoni

Proteste e dhunshme ne Shkup ( Video )

Mijëra protestues demonstruan sot në Shkup kundër dënimit me burgim të përjetshëm të gjashtë shqiptarëve, që akuzoheshin për vrasjen para dy vjetëve të pesë maqedonasve.

Protesta u shndërrua në dhunë. Pas faljes në xhamitë e kryeqytetit, pjesëmarrësit marshuan drejt Gjykatës Themelore, ku dhjetra protestues sulmuan me gurë policinë. Ata hodhën gurë e sende të tjera edhe drejt Gjykatës, duke i shkaktuar dëme.

Në protesta pati flamuj shqiptarë dhe kërkesa për drejtësi, por edhe thirrje si Allahu Ekber (Zoti është i madh) dhe thirrje të tjera islamike. Ndërkohë, dhjetra protestues thirrën me fjalë fyese kundër kryetarit të Bashkimit Demokratik për Integrim, Ali Ahmeti.

Disa nga protestuesit u përpoqën të pengonin gazetarët në punën e tyre dhe njëri prej tyre goditi korrespondentin e Zërit të Amerikës.

Për të shpërndarë protestuesit e dhunshëm, policia speciale përdori gaz lotsjellës, bomba paralizuese dhe topa uji. Përleshja e protestuesve më radikalë me policinë zgjati disa orë. Policia arriti t’i largojë protestuesit nga platoja para gjykatës dhe lagjia Bit Pazar, drejt lagjeve shqiptare Gazi Babë, Cerovë dhe Çair.

Dyqanet e shitësve, kryesisht shqiptarë në rrugën kryesore nga Gjykata drejtë Çairit u detyruan të mbyllen për shkak të gazit lotsjellës dhe frikës nga shkallëzimi i situatës. Në mesin e protestuesve pati të arrestuar, ndërsa pritet të jepen hollësi të tjera nga ana e autoriteteve.

Related Articles

Leave a Reply

Your email address will not be published. Required fields are marked *

Back to top button