Home / Europa / Tony Blair nuk do të jetë më i dërguari për Lindjen e Mesme; ish-kryeministri britanik jep dorëheqjen

Tony Blair nuk do të jetë më i dërguari për Lindjen e Mesme; ish-kryeministri britanik jep dorëheqjen

Ish-kryeministri britanik Tony Blair do të japë dorëheqjen nga detyra e tij si i dërguari i Shteteve të Bashkuara, Bashkimit Evropian, Rusisë dhe OKB-së në Lindjen e Mesme.

Lajmin e bëjnë të ditur burime të afërta me Blair, të cituara nga BBC, sipas të cilave ai pritet të braktisë postin muajin e ardhshëm, “pasi të plotësojë angazhimet e marra”.

Blair, që e mori këtë post vetëm pak orë pasi u largua nga ai i kryeministrit të Mbretërisë së Bashkuar në vitin 2007, i ka shkruar sekretarit të përgjithshëm të OKB për të konfirmuar vendimin e tij.

Megjithatë, kanë shtuar burimet, ai do të vazhdojë të mbetet aktiv ndaj çështjeve që kanë të bëjnë me rajonin e Lindjes së Mesme.

“Zoti Blair do të mbetet plotësisht i angazhuar për të asistuar bashkëpunimin e komunitetit ndërkombëtar me Izraelin dhe Palestinën, për të sjellë progres në arritjen e zgjidhjes që parashikon krijimin e dy shteteve”, kanë thënë Burimet.

Sipas tyre, Blair beson se mund të japë kontributin e tij duke punuar me lojtarët që kanë influencë kyçe në rajon, SHBA, BE dhe të tjerët, edhe pa pasur një rol zyrtar.

Zoti Blair u ndikua në këtë vendim nga fakti se posti i tij ishte i kufizuar vetëm në mbështetjen e zhvillimit ekonomik të Palestinës dhe forcimin e institucioneve të saj, shtojnë burimet. Por, pavarësisht këtyre kufizimeve, ai beson se në 8 vitet e fundit është arritur së tepërmi.

Tani ish-kryeministri do të përqendrohet në përforcimin e marrëdhënieve mes Izraelit dhe botës Arabe, gjë që sipas tij mund të ndihmojë në përpjekjet ndërkombëtare për t’i dhënë fund bllokimeve të njëpasnjëshme të procesit të paqes me Palestinën.

Leave a Reply

%d bloggers like this: