Basha, në Vorë: Krerët e mazhorancës, presion mafioz qytetarëve
Kryetari i opozitës, Lulzim Basha u ka dërguar nga Vora një mesazh krerëve të koalicionit qeverisës.
“Jam këtu, bashkë me qytetarët e Vorës, për t’i thënë Ilir Metës, bandave kriminale që ka angazhuar në Vorë e kudo në Shqipëri ku kandidon me kandidatët e tij, se e ka kot, se as kërcënimi, as presioni, as pakti i Gjirit të Lalzit që ka lidhur me bandat nuk do ta mposhtin dot vullnetin e qytetarëve të Vorës për të votuar të lirë për kandidatin që duan ata, për ofertën që duan ata”, deklaroi Basha.
Në 25 vjet pluralizëm, u shpreh ai, kurrë nuk ka ndodhur që një kandidat, e aq më pak një kandidat i opozitës, të detyrohet të zgjedhë mes biznesit dhe mandatit.
“Ky është një presion i papranueshëm i një stili korruptiv, mafioz, i denjë vetëm për Ilir Metën dhe skodën e tij, i denjë për dyshen Rama-Meta, i denjë për honet më të thella të antivlerave që sot vërtetiten me xhama të zinj në Bashkinë e Vorës, të Lezhës, të Ersekës e kudo ku kandidojnë hijet e Ilir Metës, të cilët e gjejnë të pamundur të përballen me qytetarët”, vijoi Basha.
Sipas tij, të vetmen shpresë krerët e mazhorancës kanë ndihmën e mafias, të bandave dhe kërbaçit qeveritar.
“E kanë kot. Vullneti i qytetarëve nuk mposhtet, vullneti i qytetarëve nuk blihet. Asnjë bandit, asnjë bandë, asnjë grupin mafioz me apo pa mbështetjen e kryetarit të Kuvendit, apo të kryeministrit të vendit nuk mund dhe nuk do e devijojë vullnetin e qytetarëve të lirë. Ne jemi sot më besimplotë se kurrë në fitoren tonë, fitoren e qytetarëve të Vorës, e mishëruar në kandidaturën tonë fituese me personin, me qytetarin me integritet të lartë, në drejtuesin që ka prodhuar të mira dhe shërbime për Vorën, me Fiqiri Ismailin”, shtoi Basha.
