Home / Politika / Konferenca e nivelit të lartë mbi transportin në BE dhe Ballkanin Perëndimor

Konferenca e nivelit të lartë mbi transportin në BE dhe Ballkanin Perëndimor

Në prag të mbylljes së Presidencës së Letonisë, në Riga po mbahet konferenca dyditore e nivelit të lartë mbi transportin në Bashkimin Europian, por dhe Ballkanin Perëndimor, meqenëse 6 vendet e rajonit janë pjesë thelbësore e rrjetit ndëreuropian, siç u konfirmua në Bruksel me tryezën e kryeministrave, më 21 Prill.

“Hapat e mëtejshëm të integrimit të Ballkanit në këtë rrjet qendror” u diskutuan në takimin e posaçëm të Komisioneres Violeta Bulc me ministrat e Shqipërisë, Kosovës, Bosnjës, Malit të Zi, Maqedonisë dhe Serbisë. Në deklaratën e saj për shtyp, komisionerja sllovene e konsideron tryezën me Ballkanin “një gur themeli për lidhjen e Europës me fqinjët”.

“Ngritja e një rrjeti të integruar të transportit për lehtësimin e lëvizjeve të njerëzve dhe të tregtisë do të kontribuojë për zhvillimin ekonomik të Ballkanit”, sipas saj.

“Zbatimi i suksesshëm i rrjetit qendror në këtë rajon, sidoqoftë, do të varet nga përcaktimi i duhur i ‘bërthamës’ së projekteve prioritare”, vijon deklarata, ku “përveç investimeve në infrastrukturë, duhen ndërmarrë masa horizontale për ta bërë sistemin e transportit më efiçent në Ballkan, por dhe më tërheqës ndaj investimeve të huaja”.

Ministrat e Ballkanit shqyrtuan hartat për zgjerimin e rrjetit qendror, ndërkohë që janë pajtuar për mandatin e Koordinatorit të Korridorit dhe presin për mbajtjen e tryezës sê Vienës më 27 Gusht.

“Prej shumë vitesh po punojmë fort për këtë krijim kuadri ligjor, të mirëvendosur dhe afatgjatë,  i cili do mund t’i rezistonte presioneve të kohës dhe të politikës”, tha Bulc.

Në këtë konferencë, mbi 1000 pjesëmarrës dhe 16 Ministra të BE-së diskutojnë për politikat e infrastrukturës së transportit europian, me fokus në zgjidhjet më të mira për të zbatuar dhe financuar projektet qëndrore të rrjetit, siç është dhe hekurudha Baltike, e firmosur tashmë nga të 5 ministrat përgjegjës për zbatimin e saj.

Përgatiti: Arta Tozaj

Leave a Reply

%d bloggers like this: