I nxehti i “merr frymën” Italisë, temperaturat mbi 40 gradë
Deri të mërkurën, në Itali termometri do të shënojë mbi 40 gradë celsius, ndërsa e gjithë Europa ka hyrë ngadalë në darën e një të nxehti përvëlues.
E djela solli që në orët e para të ditës temperatura mbi mesataren në fqinjin tonë të përtej Adriatikut. Më e larta, 37 gradë, u shënua në Alesandria, Firence dhe Terni.
Në mjaft qytete të tjera, mes të cilave edhe Bolonja e Milano, u regjistruan 36 gradë celsius, por real feel-i ishte edhe më i lartë.
Autoritetet vendase kanë nisur marrjen e masave kundër vapës dhe në vazhdën e tyre, turistëve e kalimtarëve në kryeqytetin Romë iu shpërndanë 20.000 shishe uji.
Mbi 35 persona janë shtruar në spital në Xhenova, pjesa dërrmuese e të cilëve të moshuar. Ndërkohë, dy persona të moshave 60 dhe 76 vjeç vdiqën në Bergamo për shkak të problemeve nga i nxehti që i ka goditur në rrugë.
Ndërkohë, 40.3 gradë Celsius tregoi termometri në qytezën bavareze Kitzigen, temperatura më e lartë e regjistruar ndonjëherë në atë vend, sipas “Stuttgater Nachrichten”.
Spanja dhe Portugalia po bëjnë llogaritë me zjarret. Mbi 1.350 vetë u evakuuan në Aragone të Spanjës, ndërsa disa vatra zjarri janë lokalizuar në pyjet e Alkobertas, në veri të Lisbonës.
Meteorologët parashikojnë që vala e të nxehtit me temperatura mbi 40 gradë të zgjasë të paktën edhe për një javë tjetër në gadishullin iberik.
