SHBA, George Bush i vjetri shtrohet në spital

Ish-presidenti amerikan George HW Bush, i njohur ndryshe si Bushi i vjetër, është shtruar në spital pasi ka pësuar thyerjen e një kocke të qafës, si pasojë e rrëzimit në shtëpinë e tij në Mein.

Zëdhënësi i tij deklaroi se ish-presidenti është në gjendje të qëndrueshme dhe se qëndrimi i tij në spital pritet të jetë i shkurtër.

Jim McGrath tha gjithashtu se Bush, më i vjetri i 4 ish-presidentëve ende në jetë, do të mbajë një qafore për shkak të incidentit të ndodhur mëngjesin e së mërkurës në banesën e tij.

Zoti Bush, që vuan nga sëmundja e Parkinsonit dhe nuk mund të përdorë këmbët e tij, festoi 90-vjetorin e tij vitin e kaluar me një hedhje me parashutë.

Ndërsa në fund të vitit të kaluar atij iu desh të shtrohej në spital për shkak të disa problemeve me frymëmarrjen.