Pr.ligji i Procedurave Tatimore, Cani: Është 3-fishuar përdorimi i kasave; Bode: Do fundosen bizneset e vogla

Komisioni i Ekonomisë ka diskutuar ditën e hënë projekt ligjin për procedurat tatimore, ndryshimet e të cilit duket se kanë sjellë debat mes qeverisë dhe opozitës. Ministri Cani deklaroi në nisje se këta ndryshime janë pjesë e reformës së thellë të ndërmarrë nga qeveria, në kuadër të luftës kundër informalitetit. Cani theksoi se, rezultatet e kësaj reforme u panë në 20 % të bizneseve që rezultuan të mbyllura në nisje të aksionit. Gjithashtu ministri citoi shifrat e QKR-së që vetëm gjatë muajit shtator u regjistruan 12 mijë biznese të reja dhe janë tre fishuar përdorimi i kasave fiskale.

Diskutimet nisën kur ish-ministri i Financave Ridvan Bode deklaroi se masat janë shumë të ashpra dhe se kjo paketë do të sjellë vetëm efekte negative. “ Këto ndryshime do të fundosin bizneset e vogla, të cilët nuk do të jenë në gjendje t’i përballojnë këto masa”- u shpreh opozitari Bode. Deputeti i PD-së gjithashtu deklaroi se ashpërsimi i masave janë marrë në urgjencën e çoroditjeve për të mbuluar deficitet buxhetore. Komisioni diskutoi: Projektligji “Për disa ndryshime dhe shtesa në ligjin nr.9920, datë 18.5.2008, “Për procedurat tatimore në Republikën e Shqipërisë”, të ndryshuar”.

PROJEKtLIGJI “PËR DISA NDRYSHIME DHE SHTESA NË LIGJIN NR.9920, DATË 19.5.2008,

‘PËR PROCEDURAT TATIMORE NË REPUBLIKËN E SHQIPËRISË’, TË NDRYSHUAR”

QËLLIMI I PROJEKTLIGJIT DHE OBJEKTIVAT QË SYNOHEN TË ARRIHEN

Përgatitja e projektligjit “Për disa ndryshime dhe shtesa në ligjin nr.9920, datë 18.5.2008, “Për procedurat tatimore në Republikën e Shqipërisë”, të ndryshuar”, është mbështetur në nenet 78 dhe 83, pika 1, të Kushtetutës. Ky projektligj është pjesë e paketës së masave ligjore në luftën ndaj informalitetit. Miratimi i këtij projektligji duhet të bëhet me procedurë të përshpjetuar për arsye se tërësia e masave të propozuara lidhen me forcimin e penaliteteve për shkeljet kryeosre në fushën tatimore, të cilat prodhojnë evazion të konsiderueshëm fiskal në mungesën e të ardhurave në buxhetin e shtetit.

VLERËSIMI I PROJEKTAKTIT NË RAPORT ME PROGRAMIN POLITIK TË KËSHILLIT TË MINISTRAVE, ME PROGRAMIN ANALITIK TË AKTEVE DHE DOKUMENTE TË TJERA POLITIKE

Propozimet e bëra në këtë projektligj synojnë forcimin e procedurave tatimore për të mbyllur disa shtigje ligjore për nëndeklarim. Paralelisht, propozohen masa që do të rritin vetëdeklarimin dhe ndërgjegjësimin e tatimpaguesve në pagesën e detyrimeve tatimore. Tërësia e propozimeve ka ardhur nga administrata tatimore, si nevojshmëri për adresime ligjore nga situata praktike në terren. Projektakti është i parashikuar në programin analitik të projektakteve që do të paraqiten për shqyrtim në Këshillin e Ministrave, gjatë 4-mujorit të tretë të vitit 2015.

ARGUMENTIMI I PROJEKTLIGJIT LIDHUR ME PËRPARËSITË, PROBLEMATIKAT, EFEKTET E PRITSHME

Miratimi i këtij projektligji do të sjellë disa ndryshime të rëndësishme, për sa u përket procedurave tatimore, për të krijuar një klimë lehtësuese biznesi për konkurrencë të ndershme dhe rritjen e vetëdeklarimit. 1 Propozimet kryesore të këtij projektligji në luftën ndaj informalitetit fokusohen në këto drejtime kryesore: 1. Mospërditësimi i të dhënave nga ana e një tatimpaguesi konsiderohet si ushtrim veprimtarie ekonomiko-tregtare të paregjistruar; 2. E drejta e blerësit për të mos paguar për vlerën e mallit ose shërbimit të marrë, nëse shitësi nuk lëshon faturën tatimore ose kuponin tatimor; 3. Afishimi nga tatimpaguesi në një vend të dukshëm në adresën ku kryen veprimtarinë, të një njoftimi për blerësin; 4. Moslejimi i shitjes me kasë fiskale nga tatimpaguesit që kryejnë shitje me shumicë të mallrave tek individët, duke filluar nga data 1 prill 2016. Për periudhën tranzitore, këto shitje me kupon tatimor të lëshuar nga pajisja fiskale, nuk duhet të tejkalojnë 10% të vlerës së tatueshme të mallrave të shitura gjatë së njëjtës periudhë tatimore të muajit të vitit të kaluar; 5. Krijimi i bazës të të dhënave të numrave IMEI të telefonisë celulare te Drejtoria e Përgjithshme e Tatimeve, në të cilën regjistrohen të gjitha numrat IMEI të telefonave celularë në momentin e importimit dhe të gjithë numrave IMEI të telefonave që shiten nga tatimpaguesit në tregun vendas, shitës me shumicë dhe shitës me pakicë, pa cenuar legjislacionin në fuqi për mbrojtjen e të dhënave personale. 6. Zbatimi i dënimeve administrative edhe në rastet kur tatimpaguesi nuk paguan në afat këstet paraprake të tatimit mbi fitimin ose këstet paraprake të tatimit të thjeshtuar mbi fitimin; 7. E drejta e administratës tatimore, në rast se një tatimpagues ka borxhe tek administrata tatimore, për të verifikuar dhe monitoruar në vend aktivitetin tregtar të tatimpaguesit me qëllim konfiskimin në fund të çdo dite të një shume jo më pak se 50% të qarkullimit të realizuar; 8. Mosbërja e kallëzimit penal nga administrata tatimore, në përputhje me nenin e përmendur më poshtë, për tatimpaguesit, të cilët me vullnetin e tyre deklarojnë dhe për pasojë korrigjojnë një deklaratë tatimore të plotësuar qëllimisht gabim, në kushtet e nenit 116 (Evazioni tatimor) të ligjit, pavarësisht periudhës tatimore që i përket kjo deklaratë, si dhe paguajnë menjëherë detyrimin tatimor përkatës; 9. Heqja e statusit të nëpunësit civil për inspektorët tatimorë që kanë kontakte të drejtpërdrejta me tatimpaguesin.

Ndryshimet që propozon ky projektligj janë, si më poshtë vijon:

Në nenin 1 të projektligjit propozhet që të riformulohet neni 19,pasi stukturat e administratës tatimore tashmë trajtohen sipas legjislacionit në fuqi për nëpunësin civil. Në nenin 2 të projektligjit propozohet që pas pikës 3, të nenit 22, të shtohet një pikë e veçantë që përcakton se Drejtori i Përgjithshëm i Tatimeve miraton rregulloren e brendshme të institucionit, e cila detajon rastet e hkeljeve , në përputhje me legjislacionin në fuqi. Ky propozim është në përputhje me nenin 1 të këtij projektligji. Në nenin 3 të projektligjit propozohet që në nenin 26, “Shmangia e konfliktit të interesit”, të shtohen pikat 4 dhe 5. Sipas pikës 4 nëpunësit e administratës tatimore qendrore dhe vendore ndalohen që të kenë zyra të kontabilitetit apo konsulencës fiskale nën pronësi të tyre apo të afërm të tyre deri në shkallë të tretë, pra bashkëshorti/ja, fëmijët, motra, vëllai, prindërit. Kjo situatë përbën konflikt interesi dhe ndaj nëpunësit të administratës tatimore qendrore dhe vendore, që gëzon statusin e nëpunësit civil, merren masat e parashikuara nga legjislacioni në fuqi për shmangien e konfliktit të interesit.

Ndërsa sipas pikës 5, në rast konstatimi të kësaj situate, merret masa e largimit nga puna me pa të drejtë punësimi në administratën tatimore. Ky propozim synon të forcojë rastet e konfliktit të interesit si për nëpunësit aktualë të administratës tatimore, ashtu edhe për të punësuarit e rinj. Sipas praktikave ka rezultuar që janë vetë inspektorët tatimorë ose të afërm të tyre, të cilët, nëpërmjet zyrave të kontabilitetit, përgatitin pasqyrat financiare të tatimpaguesve dhe janë po vetë ata që i kontrollojnë. Ky fenomen është vërejtur edhe në rastet e konsulencës fiskale.

Në nenin 4 të projektligjit propozohet një ndërhyrje në nenin 40, pika 2, për të adresuar një problematikë të Lotarisë Kombëtare gjatë ushtrimit të aktivitetit të saj, në lidhje me çështjen e pagesës së taksave vendore për NIPT-et sekondare 3 të pikave të shitjeve (agjentët e autorizuar) të Lotarisë Kombëtare. Këto NIPT-e sekondare të Lotarisë janë për arsye monitorimi sepse Lotaria Kombëtare operon me sistem qendror ku të gjitha të dhënat centralizohen në qendër. Mirëpo, nga ana e bashkive dhe komunave janë trajtuar si vendndodhje të përhershme biznesi, duke aplikuar tarifat vendore si për shembull tarifat e pastrimit apo gjelbërimit. Për të adresuar këtë problematikë, në nenin 40, pas pikës 2, propozohet të shtohet pika 2.1, me këtë përmbajtje: “2.1 “Numri i identifikimit tatimor të tyre nuk prodhon detyrime tatimore për subjektet e licencuara për organizimin e Lotarisë Kombëtare, që e ushtrojnë aktivitetin e tyre nëpërmjet ndërmjetësit në vendin e biznesit të këtyre të fundit të regjistruar sipas pikës 1, të këtij neni, për sa kohë detyrimi për të paguar tatimet vendore i mbetet vetëm ndërmjetësit sipas adresës së tij të regjistruar të biznesit ku ushtron aktivitetin e tij si i pavarur dhe si ndërmjetës.”. Në nenin 5 të projektligjit propozohet që për qëllime të ligjit të procedurave tatimore konsiderohet se ushtron veprimtari ekonomiko-tregtare pa u regjistruar çdo tatimpagues i cili konstatohet se kryen veprimtari në adresa të padeklaruara për të cilat nuk ka kryer përditësimin e të dhënave në përputhje me nenin 43 të ligjit. Përditësimi i vendndodhjes së biznesit është detyrim ligjor dhe moszbatimi i këtij detyrimi ligjor konsiderohet se tatimpaguesi i shmanget vetëdeklarimit të vendndodhjes së biznesit të tij dhe kryen veprimtari ekonomike-tregtare të paregjistruar. Në nenin 6 të projektligjit propozohet që në nenin 46, “Dokumentimi dhe mbajtja e të dhënave tatimore për tatimpaguesit, subjekt i TVSh-së ose i tatimfitimit”, të shtohet një masë penalizuese për subjektet që nuk lëshojnë faturë ose kuponin tatimor dhe konkretisht propozohet që çdo blerësi person fizik, juridik ose individ, i lind e drejta të mos paguajë për vlerën e mallit ose shërbimit të marrë, nëse shitësi nuk lëshon faturën tatimore ose kuponin tatimor në përputhje me këtë ligj.

Në funksion të realizimit të këtij detyrimi ligjor, tatimpaguesi detyrohet të afishojë në një vend të dukshëm në adresën ku kryen veprimtarinë, një njoftim për blerësin në përputhje me këtë nen. Kjo masë propozohet në koherencë me të gjitha propozimet e tjera në këtë projektligj, për forcimin e dënimeve administrative nga moslëshimi i faturës apo kuponit tatimor. Në nenin 7 të projektligjit, në kuadër të forcimit të masave për lëshimin e kuponit tatimor, propozohet një masë tjetër shtrënguese për bizneset lidhur me lëshimin e kuponit tatimor. Kështu, në nenin 54 të ligjit në fuqi, për proceduravt mbi kuponin tatimor propozohet që nga data 1 prill 2016, tatimpaguesit, që 4 kryejnë shitje me shumicë të mallrave, nuk lejohen të shesin me kupon tatimor tek blerës joushtrues të një veprimtarie tregtare (individë). Për periudhën tranzitore nga hyrja në fuqi e këtij ligji deri në fund të këtij viti, është propozuar që shitjet me kupon tatimor të lëshuar nga pajisja fiskale nuk duhet të tejkalojnë 10% të vlerës së tatueshme të mallrave të shitura gjatë së njëjtës periudhë tatimore të muajit të vitit të kaluar, pa përfshirë TVSH-në. Propozimi i kësaj mase lidhet me konstatimet në terren nga administrata tatimore sipas së cilës rezulton se bizneset, që shesin mallra me shumicë, i bëjnë mbi 80% të shitjeve të tyre tek individët, me kupon tatimor, duke shmangur kështu raportimet e transaksioneve të biznesit dhe lëshimin e faturave tatimore. Në nenin 8 propozohet që te Drejtoria e Përgjithshme e Tatimeve të krijohet Baza e të Dhënave të numrave IMEI të telefonisë celulare, në të cilën regjistrohen të gjitha numrat IMEI të telefonave celularë në momentin e importimit dhe të gjithë numrat IMEI të telefonave që shiten nga tatimpaguesit në tregun vendas, shitës me shumicë dhe shitës me pakicë, pa cenuar legjislacionin në fuqi për mbrojtjen e të dhënave personale.

Në ligjin e vjetër të TVSH-së, ligji nr.7928, datë 27.4.1995, i shfuqizuar me ligjn nr.92/2014, “Për tatimin mbi vlerën e shtuar”, në nenin 26 ishte përcaktuar detyrimi ligjor i operatoreve të telefonisë celulare për ofrimin e shërbimit vetëm për aparatet celulare, të cilat kanë të regjistruar numrin IMEI. Konkretisht, ligji i TVSH-së, nr.7928, datë 27.4.1995, neni 26 saktësonte se: “Operatorët e telefonisë celulare ofrojnë shërbimet e tyre vetëm për numrat IMEI të aparateve celulare, për të cilat importuesit apo zotëruesit e tyre kanë ndjekur procedurën e mëposhtme: a) Importuesit e aparateve telefonike celulare, në çastin e deklarimit dhe të pagesës së detyrimeve fiskale pranë shërbimit doganor, duhet të deklarojnë edhe listën e numrave IMEI të aparateve të importuara; b) Individët, të cilët, në çastin e hyrjes në doganë, zotërojnë aparate celulare, që futen për herë të parë në Shqipëri, vlera e të cilave është mbi minimumin e patatueshëm, të vendosur në ligj, ndjekin të njëjtën procedurë si në shkronjën “a”, të kësaj pike; c) Individët, të cilët, në çastin e hyrjes në doganë, zotërojnë aparate celulare, që futen për herë të parë në Shqipëri, vlera e të cilave është nën minimumin e patatueshëm, të vendosur me ligj, duhet të plotësojnë dhe të dorëzojnë pranë shërbimit doganor një deklaratë individuale për numrin IMEI të aparatit telefonik cellular. Shërbimi doganor njofton zyrtarisht operatorët e telefonisë celulare për numrat IMEI, të deklaruar nga importuesit dhe individët.”.

Mirëpo, zbatueshmëria e këtij detyrimi ligjor mbeti e cunguar për arsye se nuk ka pasur një infrastrukturë të bazës të të dhënave për të bërë regjistrimin dhe miradministrimin e aparateve celulare me anë të numrave IMEI.

Mungesa e kësaj infrastrukture solli:  Tregti të pandershme:—  Informalitet 50% në tregtimin e telefonave celularë;—  Humbje e të ardhurave doganore dhe tatimore;—  Vjedhje;—  Rritje e fenomenit të vjedhjes së celularëve;—  Cenim i sigurisë së vendit.— Për të adresuar këtë problematikë disavjeçare propozohet që të shtohet një nen i veçantë në ligjin e procedurave tatimore ku të jetë qartësisht e përcaktuar ngritja e Bazës së të Dhënave të Numrave IMEI dhe detyrimi i tatimpaguseve për të populluar me të dhëna këtë bazë. Sipas nenit 8 të këtij projektligji, propozohet që Baza e të Dhënave të numrave IMEI aksesohet nga depozituesit e informacionit që janë importuesit, tatimpaguesit shitës me shumicë dhe tatimpaguesit shitës me pakicë vetëm për qëllime të popullimit të të dhënave në përputhjen me pikën 3, të këtij neni, si edhe nga inspektorët e administratës tatimore gjatë ushtrimit të kontrolleve. Inspektorëve u ndalohet të aksesojnë të dhënat e bazës sipas këtij neni jashtë objektit të një çështjeje në hetim dhe çdo akses shoqërohet me mbajtjen e një procesverbali mbi qëllimin e aksesit dhe destinacionin e të dhënave të nxjerra.”. Popullimi i Bazës së të Dhënave propozohet të bëhet si më poshtë vijon: a) Importuesit e telefonave celularë, në çastin e deklarimit dhe të pagesës së detyrimeve doganore pranë degëve doganore, duhet të deklarojnë edhe listën e numrave IMEI të aparateve të importuara, si dhe të ngarkojnë elektronikisht të gjithë informacionin e numrave IMEI respektivë në bazën e të dhënave; b) Individët, të cilët, në çastin e hyrjes në doganë, zotërojnë aparate celulare, që futen për herë të parë në Shqipëri, vlera e të cilave është mbi minimumin e patatueshëm, të vendosur në ligj, ndjekin të njëjtën procedurë si në shkronjën “a”, të kësaj pike.

Ngarkimi elektronikisht në bazën e të dhënave kryhet nga dega doganore; c) Tatimpaguesit me shumicë dhe me pakicë, brenda 1 muaji nga hyrja në fuqi e këtij ligji, duhet të ngarkojnë numrat IMEI të telefonave celularë tek Baza e të Dhënave të të gjithë telefonave celularë gjendje. Kjo praktikë duhet të ndiqet më pas për çdo telefon të ri që hedhin në treg. 6 Në nenin 9 të projektligjit propozohet të evidentohet dhe të theksohet se ndalohet mbajtja apo përdorimi i pajisjeve fiskale apo sistemeve të monitorimit të qarkullimit, të ndryshme nga ato të përcaktuara në këtë ligj apo aktet nënligjore në zbatim të këtij ligji. Për këtë arsye, propozohet të shtohet pikërisht kjo fjali te neni 55, i ligjit në fuqi për procedurat tatimore, nen i cili jep përcaktimet mbi pajisjet fiskale, karakteristikat e të cilave janë të përcaktuara me vendim të Këshillit të Ministrave dhe ofrohen vetëm nga shoqëritë e autorizuara.

Në nenin 10 të projektligjit propozohet një risi për të gjithë tatimpaguesit, të cilët i kanë të certifikuara, nga kompani të njohura audituese, pasqyrat e tyre financiare në përputhje me legjislacionin fiskal dhe për këtë arsye duhen të jenë më pak të kontrollueshëm nga administrata tatimore. Synimi i këtij propozimi është ulja e kontrolleve te bizneset e rregullta, të certifikuara si të tilla nga kompani të njohura audituese. Pika 4 e nenit 80 “Kontrolli tatimor” ka përcaktuar se zgjedhja e tatimpaguesve, që kontrollohen, bëhet në bazë të analizës së vlerësimit të riskut, të kryer nga administrata tatimore, për të identifikuar tatimpaguesin, і cili ka më shumë rrezik për ta shkelur legjislacionin tatimor. Pikërisht në këtë pikë propozohet që të shtohet se nëse tatimpaguesi ka të certifikuara, nga kompani të njohura audituese, pasqyrat financiare që dorëzon pranë administratës tatimore se janë në përputhje me legjislacionin fiskal, tatimpaguesi përfshihet në elementet me risk të ulët. Lista e kompanive audituese, modeli i certifikatës dhe rastet kur këto kompani kontrollohen për çështje të caktuara përcaktohet me udhëzim të ministrit të Financave. Kjo masë do të rritë dhe do të evidentojë bizneset e rregullta në vend, të cilat do kenë më pak kontrolle e kosto kontrolli nga/për administratën tatimore. Kjo masë vjen në vijim të ndryshimeve të ndërmarra këtë vit për të ulur dhe normuar kontrollet për qëllime tatimore. Kështu, në korrik të këtij viti u bënë ndryshimet si në ligjin e procedurave tatimore ashtu edhe në ligjin për tatim mbi vlerën e shtuar, në bazë të të cilit rimbursimi i TVSH-së bëhet në bazë të analizës së riskut nga administrata tatimore. Nën këtë koherencë, vjen edhe ky propozim duke transmetuar parimin fiskal se sa më i rregullt është një biznes, aq më pak i kontrollueshëm është dhe aq më pak kosto për të. Në nenin 11 të projektligjit propozohet një masë e re shtrënguese e mbledhjes së borxheve tatimore. Në pikën 2, të nenit 89, përcaktohet se nëse tatimpaguesi nuk përdor të drejtën e ankimit dhe nuk paguan detyrimin tatimor, administrata tatimore duhet ta mbledhë tatimin, duke përdorur njërën ose disa prej mënyrave, të parashikuara në këtë kre. Në këtë projektligj propozohet që në këtë pikë të 7 shtohet një paragraf i ri.

Sipas këtij propozimi, në funksion të mbledhjes së detyrimit tatimor të papaguar të tatimpaguesit, administrata tatimore mund të angazhojë strukturat e saj për të verifikuar dhe monitoruar në vend aktivitetin tregtar të tatimpaguesit me qëllim konfiskimin në fund të çdo dite të një shume jo më pak se 50% të qarkullimit të realizuar, por jo më shumë se detyrimi tatimor për të cilin ka filluar procedura e mbledhjes me forcë të detyrimeve tatimore, për llogari të detyrimeve tatimore të pashlyera të tatimpaguesit. Tatimpaguesi, për të cilin administrata tatimore ka filluar mbledhjen me forcë të detyrimeve tatimore të papaguara, nuk mund të kryejë transferim të shumave të parave nga llogaria e tij apo të shesë\të transferojë aktivet ose kapitalet e shoqërisë, me përjashtim të rasteve kur nëpërmjet shitjes\transferimit të aktiveve synohet shlyerja në masën 100% e detyrimit tatimor të papaguar. Në nenin 12 të projektligjit propozohet ndryshimi i pikës 1, të nenit 98, “E drejta për të kërkuar detyrimet nga pala e treta” për të saktësuar të drejtën e administratës tatimore për mbledhjen e borxheve doganore nga palët e treta. Pika 1 e nenit 98 ishte, si më poshtë vijon: “1.Administrata tatimore mund t’i kërkojë palës së tretë të kryejë pagesën e drejtpërdrejtë të çdo shume, që i detyrohet tatimpaguesit, brenda 30 ditëve kalendarike nga data e dërgimit të njoftimit kësaj pale të tretë”. Propozohet të ndryshohet, si më poshtë vijon: “1.Administrata tatimore njëkohësisht me procedurat e tjera të përcaktuara në këtë kre, mund t’i kërkojë palës së tretë të kryejë pagesën e drejtpërdrejtë të çdo shume, që kjo palë i detyrohet tatimpaguesit, brenda 30 ditëve kalendarike nga data e dërgimit të njoftimit palës së tretë.”.

Një tatimpagues ka detyrime tatimore të papaguara ndaj administratës tatimore. Ndërkohë, ky tatimpagues ka detyrime kontraktuale të pambledhura nga një palë e tretë, mospagesat e së cilës e kanë bërë tatimpaguesin të jetë në paaftësi paguese. Për këtë arsye, propozohet që ndërsa administrata tatimore fillon tërësinë e procedurave së vjeljes me forcë të borxhit tatimor nga tatimpaguesit, ka të drejtë t’i kërkojë njëkohësisht palës së tretë (e cila i ka borxh tatimpaguesit) që të bëjë pagesën për tatimpaguesin. Ky propozim synon të rritë mbledhjen e detyrimeve tatimore ndaj administratës tatimore. Në nenin 13 të projektligjit propozohet që të shtohet në pikën 1, të nenit 114, të ligjit në fuqi, një gjobë në rast të mospagimit në afat të kësteve paraprake të 8 tatimit mbi fitimin ose kësteve paraprake të tatimit të thjeshtuar mbi fitimin tatimpaguesit. Masa e gjobës është e barabartë me 15% të shumës së këstit. Neni 30 “Parapagimet”, të ligjit nr.8438, datë 28.12.1998, “Për tatimin mbi të ardhurat”, të ndryshuar, ka përcaktuar se tatimpaguesi parapaguan në llogarinë e organeve tatimore këstet tremujore të tatimit mbi fitimin, brenda datës 30 mars, për muajt janar, shkurt dhe mars; brenda datës 30 qershor, për muajt prill, maj dhe qershor; brenda datës 30 shtator, për muajt korrik, gusht dhe shtator dhe brenda datës 30 dhjetor, për muajt tetor, nëntor dhe dhjetor. Sipas po këtij neni, këstet mund të paguhen edhe në baza mujore, jo më vonë se data 15 e çdo muaji. Ndërkohë që ka një njoftim vlerësimi nga administrata tatimore si dhe një afat të përcaktuar për pagesën e këtij detyrimi, në ligjin e procedurave mungon masa e penalitetit. Kjo situatë ka përbërë raste që tatimpaguesi të mos paguajë këstet e tatimit mbi fitimin apo tatimit të thjeshtuar mbi fitimin, ndërkohë që vetë tatimpaguesi është duke gjeneruar fitim. Ky propozim synon të standardizojë të gjitha bizneset, të cilat nuk i paguajnë në afat këstet e tatimit mbi fitimin ose tatimit të thjeshtuar mbi fitimin. Masa e penalitetit propozohet 15%, aq sa edhe tatimi mbi fitimin. Në nenin 14 të projektligjit propozohet forcimi i masave në rast verifikimi të punonjësve të padeklaruar. Aktualisht, neni 119 i ligjit në fuqi përcakton masën e gjobës, të ndarë në varësi të tatimpaguesit: a) tatimpaguesit e regjistruar si subjekte të tatimit mbi vlerën e shtuar dhe tatimit mbi fitimin, me gjobë prej 500 000 (pesëqind mijë) lekë; b) tatimpaguesit e tjerë, me gjobë prej 50 000 (pesëdhjetë mijë) lekë. Për çdo konstatim të përsëritur të mosdeklarimit të punonjësve, pas aplikimit të masës së gjobës, shkelja konsiderohet evazion tatimor.

Në ndryshimin e propozuar është standardizuar masa e gjobës në 500 mijë lekë për çdo punonjës të padeklaruar, pavarësisht se tatimpaguesi është subjekt i TVSH-së dhe tatim-fitimit apo jo. Kjo për arsye se shkelja tatimore – mosdeklarimi i punonjësit, shfrytëzimi i krahut të punës, duhet të dënohet njësoj. Në nenin 15 propozohet të shtohet një nen i ri, neni 119/1, lidhur me vendosjen e penaliteteve nëse nga verifikimi dhe kontrolli rezulton se tatimpaguesi nuk ka deklaruar pagën reale të çdo të punësuari në organin tatimor, përveç detyrimit për pagimin e shumës së detyrimeve tatimore dhe kontributeve të sigurimeve 9 shoqërore e shëndetësore, të llogaritura nga data e konstatimit, dhe në këtë rast tatimpaguesi dënohet me gjobë në maësn 500 000 lek për rastin e parë të konstatimit. Çdo konstatim i përsëritur i mosdeklarimit të pagës reale të punonjësve, pas aplikimit të dënimit administrativ, si në pikën 1, të këtij neni, konsiderohet evazion tatimor, sipas nenit 116, të ligjit, dhe administrata tatimore ushtron të drejtën e parashikuar në nenin 131, të këtij ligji, duke e bërë kallëzimin penal për tatimpaguesin.”

Në nenin 16 të projektligjit propozohet forcim i penaliteteve për mbajtjen, ruajtjen apo transportin e mallrave pa faturë. Aktualisht, në bazë të nenit 121 të ligjit në fuqi për procedurat tatimore përcaktohet se në rast se gjatë ushtrimit të kontrollit nga administrata tatimore rezulton se tatimpaguesi mban në ruajtje, përdor ose transporton mallra të pashoqëruara me dokumente tatimore, administrata tatimore i konfiskon të gjithë sasinë e mallit, që mbahej në ruajtje, përdorej apo transportohej ose i ofrohet e drejta e blerjes së mallit me vlerën e tregut. Nga praktika, problematikë janë të gjithë shitësit më shumicë të mallrave, të cilat i mbajnë mallrat pa faturë tatimore si dhe i shesin (transportojnë) mallrat pa faturë. Kjo kategori tatimpaguesish është edhe kategoria më me risk për këtë çështje. Pavarësisht nga masat e marra në mënyrë të vazhdueshme nga administrata tatimore dhe kontrollet e ushtruara në këtë kategori, propozohet forcimi i penaliteteve për këto raste shkeljesh të ligjit të procedurave. Masat e propozuara janë: Në rast se tatimpaguesi që shet mallra me shumicë, që mban në ruajtje, përdor apo transporton mallra të pashoqëruara me dokumente tatimore, dënohet me 3 penalitete: 1. Gjobë në masën 10 000 000 (dhjetë milionë) lekë; 2. Konfiskim të të gjithë sasisë së mallit që mbahej në ruajtje, përdorej apo transportohej, i pashoqëruar me dokumente tatimore (me të drejtë të blerjes së mallit me vlerë tregu); 3. Rivlerësim tatimor të të ardhurave për një periudhë 6-mujore që do të thotë se e gjithë vlera e mallit i shtohet të ardhurave të tatimpaguesit për 6 muajt e mëparshëm dhe rivlerësohen detyrimet tatimore për TVSH-në dhe tatimfitimi 10 pikërisht mbi këtë bazë të re të ardhurash. Sigurisht, që mbi këto detyrime gjenerohen edhe kamatëvonesat. Në nenin 17 të projektligjit propozohen ndryshime në nenin 122 që lidhen me: 1. Rishikimin dhe strukturimin e penaliteteve në rast të moslëshimit të kuponit tatimor; 2. Rritjen e masës së gjobës kur kuponi tatimor nuk është sipas përcaktimeve ligjore dhe nënligjore; 3. Penalitet i ri kur një tatimpagues mban pajisje që nuk janë fiskale; 4. Penalitet i ri kur konstatohet se tatimpaguesi nuk afishon në një vend të dukshëm në adresën ku kryen veprimtarinë, një poster që tregon të drejtën e blerësit për të mospaguar për mallrat dhe shërbimet e blera, nëse shitësi nuk lëshon faturën tatimore ose kuponin tatimor.

Ndryshimet e propozuara në nenin 122, pika 1, konsistojnë në forcimin e penaliteteve në rast konstatimi të moslëshimit të kuponit tatimor, duke rritur masën e gjobës, si dhe duke shtuar edhe penalitete të tjera. Në nenin ekzitues të ligjit të procedurave tatimore, penalitetet në rast të moslëshimit të kuponit tatimor janë të ndara sipas llojit të biznesit, tatimpagues subjekt i tatimit mbi fitimin dhe tatimpagues të tjerë. Gjithashtu, ka dy penalitete në rast të konstatimit të dy shkeljeve radhazi dhe në rastin e tretë të konstatimit, tatimpaguesi procedohet për evazion tatimor. Ndryshimet e propozuara në këtë nen kanë riformatuar: 1. masën e gjobës për bizneset, pavarësisht nga ndarja, biznes i madh apo biznes i vogël, në masën 500 mijë lekë për rastin e parë të verifikimit, si dhe rivlerësim tatimor i të ardhurave për 6 muajt e fundit; 2. leimin e dënimit me gjobë vetëm në një rast konstatimi dhe në rastin e dytë të konstatimit, tatimpaguesi procedohet për evazion tatimor. Lëshimi i kuponit tatimor lidhet qenësisht me deklarimin e qarkullimit, i cili shërben si bazë për llogaritjen e të gjitha detyrimeve tatimore të një tatimpaguesi. Për këtë arsye, moslëshimi i kuponit tatimor është automatikisht tentativë për mospagesë të taksave. Për këtë arsye, qeveria është angazhuar tërësisht në një plan të qartë masash për uljen e informalitetit dhe i ka kushtuar një rëndësi të madhe çështjes së lëshimit të kuponit tatimor. Forcimi i këtyre penaliteteve për moslëshim kuponi tatimor synon të rritë ndërgjegjësimin e bizneseve për evidentim të plotë të qarkullimit të tyre. 11 Bazuar në ligjin e procedurave tatimore, çdo biznes (pavarësisht nga madhësia e tij) që kryen shitje me para në dorë lëshon kupon tatimor.

Në rastet kur një biznes shet tek një biznes tjetër, me vlerë deri në 150 mijë lekë, atëherë ky biznes duhet të lëshojë faturë tatimore ose faturë tatimore me TVSH, si dhe kupon tatimor sepse po bën shitje me para në dorë. Në këtë rast, në rast se biznesi lëshon faturë tatimore ose faturë tatimore me TVSH (pra ka evidentuar qarkullimin e mallit), por nuk lëshon kupon tatimor, atëherë ai penalizohet me gjobë vetëm në masën 500 mijë lekë.

Në rast se ky biznes nuk lëshon as faturë tatimore ose faturë tatimore me TVSH dhe as kupon tatimor, atëherë ndaj tij zbatohen dy penalitete: • gjobë në masën 500 mijë lekë, • rivlerësim tatimor i të ardhurave për 6 muajt e fundit. Për sa më sipër, ndryshimi i propozuar lidhur me penalitetet për kuponin tatimor, që janë, si më poshtë vijon: Neni 122, pika 1, shkronja “b” është: “b) nuk lëshon kupon tatimor për të dokumentuar qarkullimin e realizuar të mallrave apo të shërbimeve: i) për çdo konstatim (verifikim) të kryer, me gjobë në masën 200 000 (dyqind mijë) lekë për tatimpaguesit e regjistruar si subjekte të tatimit mbi fitimin, dhe gjobë, në masën 50 000 (pesëdhjetë mijë) lekë për tatimpaguesit e tjerë; ii) për çdo konstatim (verifikim) tjetër pas verifikimit të parë, ku konstatohet se tatimpaguesi vazhdon të mos e lëshojë kuponin tatimor për të dokumentuar qarkullimin e realizuar të mallrave apo të shërbimeve, sipas kërkesave të këtij ligji, që i nënshtrohet një dënimi administrativ me gjobë në masën 300 000 (treqind mijë) lekë për tatimpaguesit e regjistruar si subjekte të tatimit mbi fitimin dhe gjobë, në masën 100 000 (njëqind mijë) lekë për tatimpaguesit e tjerë; iii) për çdo konstatim të përsëritur të moslëshimit të kuponit tatimor, pas aplikimit të dy dënimeve administrative, si më sipër, që konsiderohet evazion tatimor, sipas nenit 116, të ligjit, dhe administrata tatimore ushtron të drejtën e parashikuar në nenin 131, të këtij ligji, duke e kallëzuar penalisht tatimpaguesin.”. Neni 122, pika 1, shkronja “b”, propozohet të bëhet: 12 “1. Tatimpaguesi, person juridik ose fizik, tregtar, dënohet në rast se: b) nuk lëshon kupon tatimor për të dokumentuar qarkullimin e realizuar të mallrave apo të shërbimeve: i)Për çdo konstatim (verifikim) të kryer, me gjobë të barabartë me 100 për qind të detyrimit tatimor, të padeklaruar ose të papaguar, si rezultat i moslëshimit të faturës, përveç detyrimeve tatimore dhe interesave, që llogariten dhe paguhen në përputhje me dispozitat e këtij ligji dhe të ligjeve specifike tatimore, me gjobë në masën 500 000 (pesëqind mijë) lekë dhe rivlerësim tatimor i të ardhurave për 6 muajt e fundit. ii)Për çdo konstatim (verifikim) tjetër pas verifikimit të parë sipas shkronjë i) të këtij neni, ku konstatohet se tatimpaguesi vazhdon të mos e lëshojë kuponin tatimor për të dokumentuar qarkullimin e realizuar të mallrave apo të shërbimeve sipas kërkesave të këtij ligji, si më sipër, konsiderohet evazion tatimor, sipas nenit 116, të ligjit, dhe administrata tatimore ushtron të drejtën e parashikuar në nenin 131, të këtij ligji, duke e kallëzuar penalisht tatimpaguesin. iii) Në rastet kur tatimpaguesi ka lëshuar faturë tatimore por jo kupon tatimor, dënohet me gjobë në masën 500 000 (pesëqind mijë) lekë.”

Gjithashtu, është rishikuar me rritje masa e gjobës në rast konstatimi të lëshimit të një kuponi tatimor/dëftese tatimore/bilete me vlerë të parashtypur, që nuk përmban elementet e përcaktuara në ligjin e procedurave tatimore dhe në aktet nënligjore, nga 30 mijë lekë në 100 mijë lekë. Neni 122, pika 1, shkronja “c” është: “c) lëshon një kupon tatimor/dëftesë tatimore/biletë me vlerë të parashtypur, që nuk përmban elementet e përcaktuara në këtë ligj dhe në aktet nënligjore, për kuponin tatimor/dëftesën tatimore/biletën me vlerë të parashtypur, me gjobë, në masën 30 000 (tridhjetë mijë) lekë.”. Neni 122, pika 1, shkronja “c”, propozohet të bëhet “c) lëshon një kupon tatimor/dëftesë tatimore/biletë me vlerë të parashtypur, që nuk përmban elementet e përcaktuara në këtë ligj dhe në aktet nënligjore, për kuponin tatimor/dëftesën tatimore/biletën me vlerë të parashtypur, me gjobë, në masën 100,000 (njëqind mijë) lekë.”. 13 Në nenin 122 është shtuar një penalitet i ri në linjë me propozimin e bërë për shtesën në nenin 46 se çdo blerësi person fizik, juridik ose individ, i lind e drejta të mos paguajë për vlerën e mallit ose shërbimit të marrë, nëse shitësi nuk lëshon faturën tatimore ose kuponin tatimor në përputhje me këtë ligj. Për këtë qëllim, tatimpaguesi detyrohet të afishojë në një vend të dukshëm, në adresën ku kryen veprimtarinë, një njoftim për blerësin. Në rast se tatimpaguesi nuk afishon në një vend të dukshëm në adresën ku kryen veprimtarinë një poster që tregon të drejtën e blerësit për të mos paguar për mallrat dhe shërbimet e blera, atëherë ai dënohet me gjobë në masën 500 000 (pesëqind mijë) lekë. Në linjë me propozimin e bërë për shtesën në nenin 55 se ndalohet mbajtja apo përdorimi i pajisjeve fiskale apo sistemeve të monitormit të qarkullimit, të cilat nuk janë në përputhje me ligjin, në nenin 122 propozohet të shtohet penaliteti në rast konstatimi të kësaj shkeljeje dhe konkretisht dënim me konfiskim të mallrave gjendje dhe procedim për evazion tatimor. Në nenin 18 të projektligjit propozohet formulim i ri i nenit 124 “Kundërvajtjet në lëshimin e faturave tatimore” si në titull dhe në përmbajtje.

Në linjë me propozimet e bëra në këtë projektligji, është riparë i gjithë neni 124, i cili aktualisht ka të përcaktuar masën e penaliteteve të moslëshimit të faturës tatimore. Sikurse u rishikuan në rritje dhe riformatim masat e penaliteteve të moslëshimit të kuponit tatimor, me të njëjtën linjë dhe logjikë janë riparë me synim forcimin e penaliteteve për moslëshimin të faturave dhe si më poshtë. Aktualisht, në ligj përcaktohen penalitetet për moslëshim fature tatimore dhe faturë tatimore me TVSH. Në riformulimin e nenit janë shtuar edhe dëftesat tatimore, si dhe dokumente të tjera tatimore. Në ligjin ekzistues, në rast se gjatë ushtrimit të një kontrolli tatimor rezulton se subjekti nuk ka lëshuar faturë tatimore apo faturë tatimore me TVSH, atëherë ndaj tij aplikohet një penalitet 100% i detyrimit tatimor. Pra, në rast se një tatimpagues nuk ka lëshuar një faturë tatimore në vlerën 10 mijë lekë, atëherë mbi këtë vlerë 10 mijë lekë, llogaritet TVSH-ja dhe tatimfitimi mbi shumën e TVSH-së dhe tatimit mbi fitimin i shtohet detyrimi 100% plus kamatëvonesat dhe gjobat. Duke iu referuar problematikës së tatimpaguesve të shitjes me shumicë të mallrave sipas ndryshimeve që propozohen në nenin 121, në të njëjtën koherencë propozohet që në rast se konstatohet moslëshim fature nga kjo kategori tatimpaguesish, penalitetet do të jenë më të rënda se në rastet e 14 tatimpaguesve të tjerë. Kjo për arsye se moslëshimi i faturës nga tatimpaguesit që shesin mallra me shumicë krijon efektin zinxhir të moslëshimit të faturës për atë mall edhe në hallkat e tjera, tek shitja me pakicë e tek fundori. Forcimi i penaliteteve te tatimpaguesit që shesin me shumicë dhe frenimi i kësaj kategorie do të sjellë automatikisht rregullim dhe formalizim të shitjes me faturë edhe në zinxhirët në vijim ku kryhet transaksioni mallit. Për këtë arsye, propozohet që në rast se një tatimpagues që shet me shumicë mallra konstatohet se shet pa faturë ndaj tij zbatohen 3 penalitete njëherazi, për herën e parë të konstatimit: 1. Gjobë të barabartë me 100 për qind të detyrimit tatimor, të padeklaruar ose të papaguar, si rezultat i moslëshimit të faturës; 2. Gjobë në masën 10 000 000 (dhjetë milonë) lekë; 3. Rivlerësim i të ardhurave për një periudhë 6-mujore. Për çdo konstatim (verifikim) tjetër pas verifikimit të parë, tatimpaguesi procedohet për evazion tatimor. Në linjë me propozimin e bërë se tatimpaguesit që shesin mallra me shumicë, nga data 1 prill 2016, nuk duhet të shesin tek individët me kupon tatimor, për moszbatimin e kësaj mase propozohet edhe penaliteti përkatës, që llogaritet TVSH-ja në masën që ky mall do të tregtohej me pakicë për konsumatorin final Më poshtë është neni 124 sipas ligjit aktual dhe neni 124 sipas propozimeve në këtë projektligj: Neni 124 është: Kundërvajtjet në lëshimin e faturave tatimore Moslëshimi i faturës tatimore apo і faturës tatimore me TVSH dënohet me gjobë të barabartë me 100 për qind të detyrimit tatimor, të padeklaruar ose të papaguar, si rezultat i moslëshimit të faturës, përveç detyrimeve tatimore dhe interesave, që llogariten dhe paguhen në përputhje me dispozitat e këtij ligji dhe të ligjeve specifike tatimore.

Neni 124 propozohet të bëhet: “Neni 124 Kundërvajtjet në lëshimin e faturave tatimore, dëftesave tatimore dhe dokumentimin e transaksioneve”. 15 1. Moslëshimi i faturës tatimore, dëftesës tatimore apo і faturës tatimore me TVSH dënohet me gjobë të barabartë me 100 për qind të detyrimit tatimor, të padeklaruar ose të papaguar, si rezultat i moslëshimit të faturës, përveç detyrimeve tatimore dhe interesave, që llogariten dhe paguhen në përputhje me dispozitat e këtij ligji dhe të ligjeve specifike tatimore. 2. Moslëshimi i faturës tatimore, dëftesës tatimore apo і faturës tatimore me TVSH nga tatimpaguesi që shet mallra me shumicë dënohet me gjobë të barabartë me 100 për qind të detyrimit tatimor, të padeklaruar ose të papaguar, si rezultat i moslëshimit të faturës, përveç detyrimeve tatimore dhe interesave, që llogariten dhe paguhen në përputhje me dispozitat e këtij ligji dhe të ligjeve specifike tatimore, me gjobë në masën 10 000 000 (dhjetë milionë) lekë dhe rivlerësim i të ardhurave për një periudhë 6-mujore. Për çdo konstatim (verifikim) tjetër pas verifikimit të parë, sipas pikës 2, të këtij neni, konsiderohet evazion tatimor, sipas nenit 116, të ligjit, dhe administrata tatimore ushtron të drejtën e parashikuar në nenin 131, të këtij ligji, duke e kallëzuar penalisht tatimpaguesin. 3. Në rast konstatimi të mospërmbushjes së detyrimit sipas nenit 54, pika 5 të këtij ligji, tatimpaguesi dënohet me gjobë në masën 100% të vlerës së TVSh-së që i përket vlerës së shitjeve që tejkalojnë kufirin e lejuar për shitjet me kupon tatimor siç përcaktohet në nenin 54, pika 5 të këtij ligji deri në datën 31.03.2016. 4. Në rast konstatimi të mospërmbushjes së detyrimit sipas nenit 54, pika 5 të këtij ligji, tatimpaguesit i llogaritet TVSH-ja në masën që ky mall do të tregtohej me pakicë për konsumatorin final si dhe do të dënohet me gjobë në masën 100% të vlerës së TVSh-së së llogaritur që i përket vlerës së shitjeve që tejkalojnë kufirin e lejuar për shitjet me kupon tatimor, siç përcaktohet në nenin 54, pika 5, të këtij ligji, deri në datën 31.3.2016.

Në nenin 19 të projektligjit propozohet të shtohen pas nenit 128/1 dy nene të reja, që lidhen me penalitetet në rast të mosrespektimit të dy procedurave tatimore të reja të propozuara në këtë projektligj dhe konkretisht: Propozohet të shtohet neni 128/2 mbi masën e gjobës për mosngarkim ose ngarkim të pasaktë të numrave IMEI tek Baza e të Dhënave nga tatimpaguesit, prej 30 mijë lekësh për çdo mosngarkim/ngarkim jo të saktë. Ky ndryshim është në përputhje me nenin 7, të këtij projektligji. 16 Propozohet të shtohet neni “Neni 128/3 “Dënimet për certifikimin e pasqyrave financiare nga audituesit”, i cili vendos penalitetin që në rast se nga kontrolli i administratës tatimore tek tatimpaguesit, pasqyrat financiare të të cilëve janë certifikuar se janë në përputhje me legjislacionin fiskal nga kompanitë audituese, rezulton detyrim tatimor, masa e detyrimit tatimor i ngarkohet e plotë tatimpaguesit, ndërsa kompania certifikuese dënohet me një gjobë me masën e detyrimit tatimor që i ngarkohet tatimpaguesit. Në nenin 20 propozohet ndryshimi i masës së gjobës së përcaktuar në nenin 130 lidhur me mosafishimin e çmimeve të shitjes. Sipas propozimit të projektligjit propozohet që mosafishimi i çmimeve të shitjes së mallrave apo shërbimeve dënohet me gjobë me 500 000 (pesëqind mijë) lekë. Në nenin 21 propozohet që në nenin 131 të shtohet një pikë e re, pika 3, e cila konsiston në rritjen e vetëdeklarimit tatimor të tatimpaguesit për vetëkorrigjim dhe pagesa të detyrimeve tatimore. Formulimi i këtij propozimi është si më poshtë vijon: “3. Përjashtimisht, për tatimpaguesit, të cilët me vullnetin e tyre deklarojnë dhe për pasojë korrigjojnë një deklaratë tatimore të plotësuar qëllimisht gabim, në kushtet e nenit 116 të ligjit, pavarësisht periudhës tatimore që i përket kjo deklaratë, si dhe paguajnë menjëherë detyrimin tatimor përkatës, administrata tatimore në përputhje me këtë nen nuk do të bëjë kallëzim penal.

Tatimpaguesit nuk përfitojnë nga kjo dispozitë, nëse shkelja sipas paragrafit të mësipërm është konstatuar paraprakisht nga administrata tatimore.”. Në nenin 22 të projektligjit propozohet që të shtohet një nen i ri, neni 133/1, ku propozohet që tatimpaguesve, të cilët me implementimin e sistemit të ri të IT, edhe pse nuk kanë pasur përgjegjësinë tatimore për një tatim apo taksë të caktuar, janë ngarkuar me këtë përgjegjësi dhe për pasojë janë evidentuar si debitorë pranë administratës tatimore, u falen gjobat dhe interesat e përllogaritura. Me fillimn e zbatimit të sistemit të ri të IT së administratës tatimore u ngrit shqetësimi lidhur me dënimet që iu janë vënë tatimpaguesve në momentin e vënies në funksion të sistemit tatimor C@TS. Për sa i përket vitit 2014 janë nxjerrë 2.550 vendime dhe vetëm për periudhën prill-maj 2015 janë adresuar pranë kësaj drejtorie 4.582 ankime, periudhë e cila përkon me përdorimin e këtij sistemi. Dënimet janë aplikuar për sa më poshtë: 1. Për disa lloje të caktuara tatimesh apo taksash, të tilla si tatimi në burim apo taksa kombëtare, tatimpaguesit janë regjistruar vetë nga administrata tatimore pa qenë në dijeni, gjë e cila bie në kundërshtim me ligjin nr.9920, datë 19.5.2008, “Për procedurat tatimore në RSH”, neni 32, “E drejta për 17 njoftim”. Regjistrimi për këtë përgjegjësi tatimore nga vetë administrata tatimore, detyrimisht duhet t’u njoftohej tatimpaguesve dhe këta të fundit duhet të viheshin në dijeni për mënyrën dhe periudhën e dorëzimit të formularëve të deklarimit dhe pagesës së tatimit në burim. Me implementimin e sistemit të ri tatimor dhe ndryshimet e legjislacionit, tatimpaguesit duhet të deklarojnë tatimin në burim çdo muaj (edhe në rastet me vlerë 0), ndryshe nga si veprohej më parë. Për këtë arsye janë vënë penalitete për mosdeklarim të detyrimeve tatimore. 2. Një vend të rëndësishëm për sa u përket kërkesave ankimore zënë edhe gjobat e mbartura ndër vite për të cilat tatimpaguesit nuk kishin qenë në dijeni (pasi administrata tatimore nuk nxjerr njoftim) dhe që u bënë evidente me vënien në përdorim të sistemit të ri. Këto gjoba në disa raste përfshijnë dhe dënimet të cilat ishin falur me ligjin nr.9986, datë11.9.2008. 3. Një çështje tjetër që ngrihet është dhe periudha e shkurtër që tatimpaguesit u vunë në dijeni për sistemin C@TS, procedurat për përdorim, si dhe pamundësinë e kryerjes së deklarimeve në periudhën janar 2015, gjë e cila solli dënimin me gjoba të shumta për tatimpaguesit.

Me argumentin se së pari periudha kohore që përkon me përshtatjen e tatimpaguesve me sistemin e ri nuk duhet të shoqërohet me gjoba, së dyti numri i tatimpaguesve që janë dënuar me gjoba për mosdeklarim në afat të deklaratave tatimore është thuajse 90%, së treti vënia e gjobave në mënyrë kaq masive cenon besimin e tatimpaguesve ndaj administratës tatimore dhe reduktimin e nivelit të vetëdeklarimit të detyrimeve tatimore dhe së fundi numri i apelimeve është shumë i madh në një kohë shumë të shkurtër, gjë që sjell pamundësi nga ana e Drejtorisë së Apelimit Tatimor për shqyrtimin e të gjitha këtyre ankesave.

INSTITUCIONET DHE ORGANET QË NGARKOHEN PËR ZBATIMIN E KËTIJ AKTI

Për zbatimin e këtij projektligji ngarkohen Drejtoria e Përgjithshme e Tatimeve dhe drejtoritë rajonale tatimore.

PERSONAT DHE INSTITUCIONET QË KANË KONTRIBUAR NË HARTIMIN E PROJEKTAKTIT

Drejtoria e Përgjithshme e Tatimeve dhe Ministria e Financave ka draftuar projektligjin.