ParlamentarePolitika

Projektligji për regjistrimin e emigrantëve, Rama: Proces historik

Shqipëria numëron mbi 4.4 milionë banorë të regjistruar në gjendjen civile dhe prej këtyre një pjesë e madhe jetojnë dhe punojnë jashtë kufijve shtetërorë. Shifrat e shtetasve shqiptarë në emigrim përllogariten në mbi 1 milionë, por asnjëherë nuk ka patur një shifër të saktë të tyre në 25 vitet e fundit.

“Sipas shifrave janë mbi 4.4 milionë shqiptarë, por ne nuk dimë sa janë këtu dhe ku dhe sa janë jashtë dhe ku. Dimë që shteti e ka të vështirë t’u shkojë pas për të bërë detyrën e vet, të japë shërbime me cilësi për ata që jetojnë këtu dhe jashtë Shqipërisë”, deklaroi në fjalën e tij, ministri i Brendshëm, Saimir Tahiri, gjatë prezantimit të pr/ligjit të regjistrimit të emigrantëve, i hartuar nga Ministria e Brendshme në bashkëpunim me dikasteret e tjera të kabinetit qeveritar.

Kryeministri Edi Rama tha se bëhet fjalë, fatkeqësisht, për një proces historik: “Është një proces fatkeqësisht historik, pasi jemi i vetmi vend i Evropës pa sistem adresash. Kjo është shëmbëlltyrë e mungesës së shtetit, që nuk di ku ka njerëzit e vet dhe t’ju mundësojë shërbimet që meritojnë”.

“Shqipëria, për shkak të mungesës së një shteti serioz, ka 25 vjet që ka lënë jashtë inventarit një pasuri siç janë shqiptarët jashtë atdheut. Emigrantët e dinë se çfarë kanë hequr për të marrë një certifikatë”, shtoi Rama.

Tahiri theksoi se “ka ardhur koha për një kontratë të re patriotike me emigrantët”: “Shteti ka detyrë të garantojë shërbime për shqiptarët që jetojnë jashtë Shqipërisë në shtëpinë e tyre. Mendojmë që borxhi që u kemi emigrantëve në mbi dy dekada, është t’u shërbejmë emigrantëve në shtëpinë e tyre. Të bëjmë regjistrimin e tyre dhe mbrapsht t’u japim shërbimet në shtëpinë që banojnë, kudo qoftë kjo. Për këtë Ministria e Brendshme ka hartuar një projektligj dhe nga janari nisim regjistrimin e banesës për çdo qytetar shqiptar që jeton jashtë Shqipërisë. Ky është detyrimi ynë patriotik për çdo shqiptar. Është një sipërmarrje që kthen pas borxhin që u kemi emigrantëve”.

Related Articles

Leave a Reply

Your email address will not be published. Required fields are marked *

Back to top button