Viktimat e avionit MH17 nisen drejt Holandës

Trupat e parë të viktimave nga rrëzimi i avionit MH17 në Ukrainë u nisën sot drejt Holandës që dekretoi një ditë zie kombëtare në kujtim të 193 shtetasve të saj që humbën jetën në këtë avion, të sulmuar, ndoshta gabimisht, nga separatistët prorusë.
”Gjashtë ditë pas katastrofës, ku si pasojë humbën jetën të paktën 298 persona në zonën rebele në lindje të Ukrainës dhe shkaktoi një tronditje dhe indinjatë në mbarë botën, trupa të shumtë ndodhen ende në vendin e rrëzimit të avionit”, theksoi sot me keqardhje kryeministri australian Tony Abbott.
“Është e mundur që shumë trupa të jenë ende në zonën e rrëzimit të avionit”, deklaroi Abbott.
Në aeroportin e Karkivit, qytet në lindje të Ukrainës nën kontrollin e qeverisë së Kievit, u mbajt një minutë heshtje në momentin e nisjes së trupave drejt Holandës.
Kutitë e zeza dorëzuar hetuesve holandezë, që do të drejtojnë hetimin ndërkombëtar mbi shkaqet e rrëzimit të avionit mbërritën sot në Britaninë e Madhe, ku do t’u jepen hetuesve britanikë për t’i analizuar.