ParlamentarePolitika

Të enjten votohen dekretet e ministrave

Katër dekretet e Presidentit të Republikës për shkarkim dhe emërim ministrash do të votohen në Kuvend në seancën e ditës së enjte.

Rendi i ditës parashikon votimin e dy dekreteve të shkarkimit të ministrit të Financave, Shkëlqim Cani dhe të ministrit të Zhvillimit Ekonomik dhe Sipërmarrjes, Arben Ahmetaj, si dhe dy dekreteve të emërimit të këtij të fundit në krye të Financave dhe të Milva Ekonomit (ish-zv/ministre e Shëndetësisë) në postin e ministrit të Ekonomisë.

Ndryshimet në qeveri, të propozuara një javë më parë nga kryeministri Edi Rama, shkaktuan përplasje institucionale mes Presidencës dhe Qeverisë, pas vendimit të pazakontë të Kreut të Shtetit për t’i përcjellë Kuvendit, fillimisht vetëm dekretet e shkarkimit, dhe vetëm në limitet e afateve kohore, përcolli dekretet e emërimit të ministrave të rinj.

Në mes të këtij debati, erdhi reagimi i fortë nga qeveria, e cila paralajmëroi se në rast se presidenti shkel afatin 7-ditor kushtetues për t’i përcjellë parlamentit të gjitha dekretet, mazhoranca do të ndërmerrte nismën për shkarkimin e tij.

Një ditë më pas, Presidenti përgjigjet me një vendim të papritur, kur i kërkon Gjykatës Kushtetuese, intepretimin e pikës 1 të nenit 98 të Kushtetutës, që i cakton Presidentit 7 ditë kohë për të çuar dekretet në parlament, pas propozimit të bërë nga kryeministri.

Por, ndërsa kjo kërkesë u depozitua zyrtarisht të hënën në Gjykatë Kushtetuese, pak orë më pas, Presidenti i Republikës, shpalli dekretet e emërimit të dy ministrave të rinj, duke i hapur rrugën votimit të tyre në parlament dhe marrjes së detyrës në kabinetin qeveritar.

Related Articles

Leave a Reply

Your email address will not be published. Required fields are marked *

Back to top button