ParlamentarePolitika

Incidentet në seancë, Byroja e Kuvendit mblidhet në orën 17:30

Byroja e Kuvendit të Shqipërisë do të mblidhet pasditen e së premtes (ora 17:30) për të shqyrtuar kërkesën e grupit parlamentar të Partisë Socialiste, që kërkon përjashtimin deri në 10 ditë nga jeta parlamentare të deputetëve të Partisë Demokratike, Genti Strazimiri, Albina Dede dhe Bedri Hoxha, për incidentet e ndodhura dje në parlament.
Në një letër që kryetari i grupit socialist, Gramoz Ruçi, i drejtoi të enjten kryeparlamentarit Ilir Meta, kërkohej mbledhja me urgjencë e Byrosë së Kuvendit për të marrë një vendim rreth ngjarjeve të djeshme në parlament.

Paraditen e sotme kryetari i Kuvendit në një prononcim për mediat tha se ishte në dijeni të kërkesës së grupit të PS-së dhe se do të veprohej në bazë të rregullores.
Seanca e djeshme e Kuvendit u përfshi nga tensioni dhe kaosi, i shkaktuar nga opozita, e cila këmbëngulte për shqyrtimin me procedurë të përshpejtuar të disa ndryshimeve në ligjin e dekriminalizimit. Shtysë për nismën ligjore të PD-së ishte rikthimi në parlament i deputetit Armando Prenga, i përfshirë në një konflikt me armë në muajin shtator. Vendimi i gjykatës i një jave më parë që caktoi masën detyrim paraqitje për Prengën, i hapi rrugën këtij të fundit që të rikthehet në Kuvend, gjë që shkaktoi zemërimin e opozitës, të cilin e shkarkoi dje në parlament duke goditur me vezë anëtarët e qeverisë.

Related Articles

Leave a Reply

Your email address will not be published. Required fields are marked *

Back to top button