Kosova

Zhbogar: Politikanët duhet të luftojnë me ide e jo me gaz lotsjellës

Shefi i zyrës së BE-së në Kosovë, Samuel Zhbogar, ka shkruar disa fjalë për situatën në Kosovë duke krahasuar vitin 2012, kohë kjo kur ai ka marrë pozitën që ka tani.

Zhbogar në shkrimin e tij të publikuar në portalin European Western Balkans, flet për procesin e MSA-së, arritjet që janë bërë në këtë proces dhe liberalizimin e vizave.

Duke vlerësuar edhe proceset tjera në Kosovë Zhbogar, ka edhe disa mesazhe për politikanët në Kosovë, si opozitë por edhe pozitë.

Zhbogar lut politikanët që t’i lejnë hedhjet e shisheve dhe t’i kthehen dialogut dhe propozimeve.

Lexojeni të plotë shkrimin e tij i cili është dërguar edhe në Agjencinë e Lajmeve KosovaPress:

Kosova ka një perspektivë të qartë evropiane dhe ngjarjet e fundit e dëshmojnë këtë.

Kur kam ardhur në Kosovë në vitin 2012, dy procese të rëndësishme filluan mes BE-së dhe Kosovës: diskutimet mbi përfundimin e Marrëveshjes së Stabilizim Asociimit (MSA) dhe një udhërrëfyes për liberalizimin e vizave.

Katër vjet më vonë, ne kemi Marrëveshjen e Stabilizim Asociimit mes Bashkimit Evropian dhe Kosovës, që do të hyjë në fuqi më 1 prill 2016, si arritja më e rëndësishme për marrëdhëniet në mes të Kosovës dhe BE-së gjatë viteve të fundit.

Kjo është kontrata e parë gjithëpërfshirëse ndërmjet BE-së dhe Kosovës, e cila ofron mjete konkrete për të përmirësuar ekonominë, të krijojë vende të reja pune, për të luftuar korrupsionin, për forcimin e demokracisë dhe sundimit të ligjit, dhe për të rritur stabilitetin politik dhe institucional.

Tash i takon Kosovës që ta fus atë në funksion për qytetarët e saj.

Sa më shumë që Kosova zbaton MSA-në, aq më afër do të jenë standardet e saj më ato të BE-së.

Dhe në fund të vitit të kaluar, Komisioni Evropian paraqiti raportin e tij përfundimtar për përmbushjen e kërkesave për liberalizimin e vizave të Kosovës. Kemi ardhur afër fundit të udhëtimit.

Ne kemi besim se Kosova mund të përmbushë disa rekomandime të mbetura në një të ardhme të afërt.

Sa më shpejt që kjo të behët, Komisioni do t’i propozojë shteteve anëtare të BE-së dhe Parlamentit Evropian heqjen e vizave për qytetarët e Kosovës.

Shtetet anëtare dhe Parlamenti Evropian janë ata që do të marrin vendimin përfundimtar i cili iu mundëson qytetarëve të Kosovës të udhëtojnë pa viza në zonën Shengen.

BE-ja është partneri kryesor i Kosovës. BE-ja dhe shtetet anëtare të saj janë investitorët, partner tregtar dhe donatorëve më të mëdhenj të Kosovës.

Gjysma e të gjitha donacioneve në Kosovë vijnë nga BE-ja dhe deri në vitin 2020 BE-ja është zotuar se do të investojë edhe 650 milionë euro në Kosovë.

Krejt çka u cekë me lart, duke përfshirë edhe ndihmën e vazhdueshme dhënë nga EULEX, tregon se si BE-ja angazhohet me aktorët politikë në Kosovë për të mbështetur stabilitetin dhe sundimin e ligjit që do të mundësojë ardhmëri për popullin e Kosovës.

Për fat të keq, gjatë disa muajve të fundit politikanët e Kosovës kanë kaluar shumicën e kohës dhe shpenzuar shumicën e energjisë duke u marrë me veten e tyre në vend që të merren me atë që njerëzit kanë nevojë: përmirësimin e ekonomisë dhe krijimin e mundësive për vende të reja pune, forcimin e sundimit të ligjit dhe luftimin korrupsionin si parakushte për mirëqenien ekonomike.

Në periudhën e ardhshme, duhet të shohim ndryshim. Kemi nevojë t’i shohim politikanët duke hedhur propozime në vend të shisheve me ujë, dhe se si ta bëjnë Kosovën më të mirë.

Ata [politikanët] na duhet që të luftojnë me ide e jo me gaz lotsjellës në mënyrë që të përmirësojnë jetën e qytetarëve të tyre. Ne kemi nevojë që ata të vënë Kosovën të parën. Ne shpresojmë se të dyja palët, qeveria dhe opozita, do të gjejnë një mënyrë për të ulur rreth tavolinës, të angazhohen në një dialog politik, dhe për të gjetur një mënyrë për të dalë nga kriza aktuale në interes të popullit të Kosovës.

Më lejoni të përmend dy arritje të vështira por të rëndësishme për Kosovën se fundi: Marrëveshjet e Brukselit në kuadër të dialogut ndërmjet Prishtinës dhe Beogradit, si dhe krijimi i Dhomave Specialiste.

Dhomat Specialiste janë një mjet i rëndësishëm i ligjit që më në fund do të qartësojë disa çështje nga e kaluara. E di se ka pasur shumë frikë mes shqiptarëve dhe serbëve në lidhje me atë që marrëveshjet e Brukselit sjellin, sidomos në aspektin e Asociacionit/Bashkësisë së komunave me shumicë serbe në Kosovë. Serbët kanë frikë integrimin në Kosovë nëse Asociacioni/Bashkësi nuk themelohet në vend. Nga ana tjetër, shumica shqiptare kanë frikë se nuk do të ketë integrim të serbëve në qoftë se Asociacioni/Bashkësia nuk jetësohet. Të dy palët kanë të drejtë për frikën e tyre, por në të njëjtën kohë ata duhet të përpiqen që të kuptojnë dhe respektojnë shqetësimet e njëri-tjetrit. Duke bërë këtë, ata do të gjejnë një mënyrë për të hartuar statutin e Asociacionit/ Bashkësisë në një mënyrë që do të bashkonte komunitetet dhe do të forconte Kosovën.

MSA do të hyjë në fuqi këtë pranverë, Dhomat Specialiste do të fillojnë të funksionojnë, dhe Asociacioni/Bashkësia do të jetësohet. Së bashku me liberalizimin e vizave, këto janë standarde të rëndësishme në rrugën evropiane të Kosovës. Në shkurtin e këtij viti, Kosova zgjedhi një president të ri. Shpresoj se ai do të investojë të gjitha njohuritë e tij dhe energji për të kapërcyer hendekun në shoqërinë e Kosovës, të bëjë dialogun politik një normë dhe të kontribuojë në avancimin e marrëdhënieve Kosovë-BE.

Ky nuk do të jetë një vit i lehtë, por unë jam optimist për të ardhmen. Kjo është për shkak se unë kam besim në njerëzit, të cilët janë punëtor të zellshëm dhe duan një Kosovë më të mirë. Unë besoj se elitat politike do të japin kontributin e tyre për një Kosovë më të begatë, duke u përqendruar më shumë në nevojat e popullit të tyre dhe më pak në grindjet politike. Si gjithmonë, BE-ja do të jetë këtu për të siguruar mbështetjen e saj.

Related Articles

Leave a Reply

Your email address will not be published. Required fields are marked *

Back to top button