Bota

Obama viziton Kubën, shpresë për shtetin komunist

Presidenti Obama niset sot për një vizitë historike në Kubë, ndërsa të dy vendet po përpiqen të normalizojnë marrëdhëniet pas 55 vitesh ndërprerjeje.

Vizita e Barack Obamës në Kubë, e para e një Presidenti amerikan prej 9 dekadash, është një portë shprese për shtetin komunist. Vendi ishullor po bëhet sot gjithmonë e më interesant për investitorët nga e gjithë bota, ndërsa përjeton një dyndje të turistëve amerikanë.
Në listën e bizneseve të lejuara për kubanezët nga viti 2011 gjen lënien e dhomave me qira dhe përdorimin e taksive. Plot 200 profesione rreshtohen aty, përfshirë dhe ato më të çuditshmet siç është mbushja e çakmakëve, thonë mediat gjermane.
Por më fitimprurëset mbeten padyshim degët e lidhura me turizmin, që ka marrë një hov të menjëhershëm pas kapitullit të ri të marrëdhënieve SHBA-Kubë, të çelur nga Obama dhe homologu i tij kubanez, Raul Castro, dhjetorin e 2014-s.
Motoja e ditës është: Shpejt në Kubë, para se të vijnë amerikanët. Vetëm nga fillimi i këtij viti, ishullin e kanë vizituar mbi një milion vetë. Pavarësisht rritjes së çmimeve, hotelet janë të prenotuar deri në 2017-n. Ky konsiderohet një moment i rëndësishëm për rikthimin e Kubës në skenën ekonomike botërore.
Pjesa tjetër e Amerikës Latine lufton me skandale korrupsioni, zhvlerësimin e valutës dhe rënien e ritmit të rritjes ekonomike. Por me gjithë euforinë, investimi në Kubë nuk është fushë me lule. Firmat ankohen për pengesa burokratike dhe mungesën e sigurisë ligjore.
Ndër sektorët e tjerë me potencial të lartë zhvillimi në vend konsiderohet ekonomia bujqësore, bioteknologjia dhe farmaceutika, por ka ende ilaçe dhe produkte bioteknologjike kubaneze, të cilave nuk u lejohet hyrja në Shtetet e Bashkuara, ndërsa embargoja amerikane e tregtisë, edhe pse me ndryshime, vazhdon të mbetet në fuqi.

Related Articles

Leave a Reply

Your email address will not be published. Required fields are marked *

Back to top button