Haxhinasto-Kuçi: Projekte infrastrukturore me Maqedoninë
Ministri i Transportit dhe Infrastrukturës, Edmond Haxhinasto, priti të shtunën në një takim Ministrin e Ekonomisë së Maqedonisë, Driton Kuçi.
Ministri Haxhinasto, vlerësoi marrëdhënien e bashkëpunimit mes dy vendeve dhe tha se hapësirat për zhvillimin e tyre të mëtejshëm janë të mëdha.
Haxhinasto u shpreh se ekzistojnë mundësitë për një liberalizim më të madh të tregjeve të dy vendeve, përfshirë edhe shërbimet e transportit. Ai kërkoi që të bëhen hapa konkrete për të lehtësuar dhe thjeshtësuar, shërbimet kufitare e doganore veçanërisht për biznesin.
Të dy ministrat njohën njëri-tjetrin me zhvillimet në infrastrukturën respektive të transportit, veçanërisht në projektet, që do të sjellin lidhje mes dy vendeve me rrugë dhe hekurudhë.
Haxhinasto, tha se së shpejti do të përfundojë edhe studimi i fisibilitetit për linjën hekurudhore Rrogozhinë-Pogradec, çfarë hap perspektivën për një lidhje mes hekurudhave të dy vendeve.
Ministri Haxhinasto, u ndal edhe te projekti i rëndësishëm i Rrugës së Arbrit, duke thënë se MTI është duke punuar për gjetjen e një formule të përshtatshme për financimin e këtij projekti.
