Kronika

Në Shqipëri do të hapet një qendër ekselence e NATO-s

Ministrja e Mbrojtjes e Shqipërisë, Mimi Kodheli, nëpërmjet një deklarate për mediat sot njoftoi për ngritjen e një qendre ekselence e NATO-s në Tiranë, për trajtimin e fenomenit të luftëtarëve të huaj.

Në Shqipëri, për herë të parë që nga anëtarësimi do të ngrihet një strukturë e NATO-s, Qendra e Ekselencës, për të luftuar fenomenin e luftëtarëve të huaj terroristë.

“Pak ditë më parë, propozimi i Ministrisë së Mbrojtjes u shqyrtua në Komitetin Ushtarak të NATO-s dhe u kalua në unanimitet të plotë nga të 28 vendet anëtare. Propozimi ynë erdhi në një moment kritik për mbarë komunitetin ndërkombëtar. Fenomeni i luftëtarëve të huaj terroristë ka marrë përmasa të konsiderueshme. Mijëra prej tyre largohen nga Evropa dhe luftojnë sot në shtete dhe territore të destabilizuara në Lindjen e Mesme. Disa prej tyre janë qytetarë të vendeve të Ballkanit Perëndimor”, u shpreh Kodheli.

Kjo qendër do të ndihmojë vendet anëtare të NATO-s, por dhe ato shtete partnere të interesuara, për të kuptuar në origjinë shkaqet dhe arsyet e radikalizimit të qytetarëve që jetojnë në hapësirën Euro-Atlantike, si dhe për të gjetur rrugët dhe mënyrat e parandalimit të këtij fenomeni.

Sipas Kodhelit, një strukture të tillë në Tiranë, do t’i shërbejë edhe institucioneve të tjera shqiptare ligjzbatuese, duke i ndihmuar ato për të kuptuar sa më mirë fenomenin e luftëtarëve të huaj dhe për të ndërvepruar me struktura të ngjashme të vendeve të Aleancës së Atlantikut.

“Projekti ynë tashmë do t’i kalojë për veprim Komandës Aleate për Transformim, e cila do të na asistojë hap pas hapi deri në përfundimin e procedurave teknike për hapjen sa më shpejt të Qendrës së Ekselencës në Tiranë”, ka theksuar më tej Kodheli.

Related Articles

Leave a Reply

Your email address will not be published. Required fields are marked *

Back to top button