Te ndryshme

Përbërësi sekret për të formësuar shijen e pijes

Kërkuesit kishin dalluar praninë e tipeve të ndryshme të një ekstrakti majaje të përfshirë në procesin e fermentimit, që përmban organizmin “Saccharomyces cerevisiae”, në krahinat e ndryshme të vendit, i cili ka një traditë të fortë të prodhimit të verës

Ndryshimet në shijet e verërave të ndryshme, të cilat janë prodhuar nga i njëjti lloj rrushi, por në krahina të ndryshme në një masë të madhe varen nga kontributi që japin mikrobet në ato territore dhe jo vetëm nga kushtet e tokës, nga lloji i klimës dhe nga praktikat agrikulturore të prodhuesit të verës.

Këtë e tregon një studim i bërë nga Universiteti i Auckland-it në Zelandën e Re, i publikuar në revistën “Scientific Reports”. Kërkime të mëparshme të të njëjtit grup kishin dalluar praninë e tipeve të ndryshme të një ekstrakti majaje të përfshirë në procesin e fermentimit, që përmban organizmin “Saccharomyces cerevisiae”, në krahinat e ndryshme të vendit, i cili ka një traditë të fortë të prodhimit të verës.

Por ende nuk ishte e qartë se në cilën mënyrë këto ndikonin në shijen e veçantë që vera e prodhuar merrte.

Prova

Në këtë mënyrë, kërkuesit izoluan 6 lloje të ndryshme organizmash “Saccharomyces cerevisiae” që shërbejnë për prodhimin e majasë, të marrë në gjashtë krahina të veçanta të Zelandës së Re. Më pas, ato i shqyrtuan me imtësi për të parë ADN-në e tyre e për të studiuar diferencat dhe më pas i përdorën për të fermentuar të njëjtin lloj rrushi “Sauvignon Blanc”, që më parë ishte sterilizuar për të përjashtuar praninë e mikrobeve të tjera.

Gjeografia ka rëndësi

Kërkuesit analizuan përqendrimet e 39 kompozimeve të ndryshme kimike, shumë të rëndësishme për shijen përfundimtare të verës, që organizmi Saccharomyces cerevisiae prodhon si produkte teprice, ndërsa transformon në alkool sheqernat e rrushit. Nga këto, 29 variojnë sipas krahinës nga ku majaja vjen. Kjo është prova se mikrobet e terrenit në të cilën verëprodhuesi rrit rrushin janë përcaktues në formësimin e raportit të ngushtë që lidh një produkt me karakteristikat e mikroklimës dhe të terrenit në të cilin ai ka origjinën.

Kontribut i rëndësishëm

Kjo do të shpjegonte pjesërisht atë ndryshimin karakteristik prej 10% në verërat të cilat prodhohen nga të njëjtët prodhues, me të njëjtat metoda, por në krahina të ndryshme. Ndryshimet gjenetike të ekstrakteve të majave, të cilat përdoren në fermentim, përcaktojnë veç të tjerash, ndryshimet në mënyrën në të cilën rrushi rritet dhe zhvillohet. E me ato, edhe një seri faktorësh të tjerë, si koha e korrjes ose maturimi i verërave në botë, që luajnë një rol parësor në krijimin e shijes përfundimtare.

Duke qenë se ndikimi që vera bën në shqisat ndijore të njeriut është thelbësor për të përcaktuar vlerën, hapi i radhës do të jetë studimi se në cilat masa, majatë e tjera, kërpudhat dhe bakteret kontribuojnë për të formësuar “karakterin” e verës.

Related Articles

Leave a Reply

Your email address will not be published. Required fields are marked *

Back to top button