U hap “Cacttus Education”, shkollë profesionale në fushën e teknologjisë së informacionit
U hap shkolla e parë e lartë profesionale në Kosovë “Cacttus Education” e cila do të ofrojë shkollim të lartë profesional dyvjeçare në disa drejtime të teknologjisë së informacionit.
Kryetari i Bordit të këtij institucioni, Driton Hapçiu, tha se ky është institucioni i parë i këtij lloji, por shpreson të mos jetë i vetmi.
“Sot është promovimi i ‘Cacttus Education’, shkollës së lartë profesionale, në fushën e teknologjisë së informacionit dhe komunikimeve. Është ky institucioni i parë dhe shpresojmë në të ardhmen edhe jo i vetmi i akredituar në nivelin e pestë pranë Autoritetit Kombëtar të Kualifikimeve që do të ofroj arsimim profesional dyvjeçar të kombinuar me praktikë profesionale në këtë lami”, u shpreh ai, transmeton KP.
Kurse, ministri i Arsimit, Arsim Bajrami, tha se kjo fushë e edukimit ka munguar deri më tani, duke u shprehur se “Cacttus Education” është shembulli më i mirë i arsimit profesional.
“Po promovojmë një projekt të munguar të edukimit të avancuar, edukimit profesional, pra, po e plotësojmë një boshllëk të kornizës kombëtare të kualifikimeve duke promovuar nivelin e munguar, nivelin e pestë të një shkolle profesionale e cila thellësisht i kushtohet nevojave të tregut të punës, edukimit profesional të njerëzve të rinj dhe edukimit për punësim sepse ky model i kësaj shkolle mundëson fillimisht një edukim të avancuar, edukim praktik duke ndërtuar kompetenca dhe shkathtësi tek nxënësit tonë dhe një edukim i cili tërësisht lidhet me zhvillimin ekonomik dhe që siguron një punësim. Duke punuar për një edukim cilësor dhe arsim cilësor ne jemi fokusuar tek profilizimi i arsimit profesional dhe padyshim që projekti ‘Cacttus Education’ është një nga shembujt më të mirë, pioniere në reformimin e arsimit profesional dhe orientimin e nxënësve tonë drejt profesioneve të shpejta”, deklaroi ai.
