Donatella Versace i bashkohet fushatës së “ALS Ice Bucket Challenge”
Stilistja e famshme italiane Donatella Versace i është bashkuar fushatës sensibilizuese të kovës së akullt që është sensacioni i fundit në rrjetet sociale.
Në videon e postuar 59-vjeçarja është e rrethuar nga dy modelë që i hedhin kovën me ujë dhe akull. Videoja është xhiruar në një kopsht me lule dhe Versace i kishte dhënë rëndësinë e duhur çdo detaji.
Stilistja vendosi të nominojë Pharrell, Prince dhe regjisorin spanjoll të filmave Pedro Almodovar. Fansat në faqen e “Faceebook”-ut, ku Donatella kishte postuar videon e saj, kishin komentuar duke shkruar: “Ky është Ice bucket Challenge më i bukur”.
Videoja në pak orë mori 37.700 “like” dhe 18.300 persona e kanë shpërndarë.
Stilistja Versace është një ndër personazhet e famshëm që i është bashkuar fushatës sensibilizuese për të mbledhur fonde në gjetjen e kurës për një sëmundje të rrallë si ALS ( Skleroza amiotrofike laterale). Fushata “ALS Ice bucket Challenge” deri në këto momente ka arritur të mbledhë rreth 94.3 milionë dollarë.
