IS-i shkatërron një qytet antik në Irak
Qeveria e Irakut ka bërë të ditur se militantët e Shtetit Islamik (IS) kanë nisur të demolojnë mbetjet e qytetit antik asirian, Nimrud, në veri të Irakut.
Ky është sulmi i fundit i tyre në trashëgiminë historike të vendit.
Ministria e Turizmit dhe Antikiteteve ka bërë publik lajmin, duke thënë se militantët kanë nisur shkatërrimin pas lutjeve të mesditës, të enjten, transmeton Evropa e Lirë.
Zyrtarë të ministrisë kanë thënë se nuk e dinë ende shkallën e shkatërrimit të qytetit historik, i cili është themeluar 3,300 vjet më parë me emrin antik Kalhu dhe ka qenë njëri nga gurët e çmuar të epokës asiriane.
Shkatërrimi i mbetjeve të Nimrudit – që është emri i mëvonshëm arab i qytetit – vjen një javë pasi militantët e Shtetit Islamik kanë publikuar një video, e cila i tregon ata duke thyer artefakte të vlefshme asiriane në muzeun e Mosulit.
