Librat e rinj

Teuta Dhimarko Kasoruho

“Shërbëtori i zotërisë së pabesë”

Redaktor: Amik Kasoruho

Botimet: “Toena”

Çmimi: 600 lekë

Pas romanit “Bukuroshi i Hollivudit” botuar më 2008-n, shkrimtarja Teuta Kasoruho vjen me një tjetër botim për lexuesin. “Shërbëtori i zotërisë së pabesë” është sprova tjetër letrare e Kasoruhos, e cila e sjell më të rritur në stil dhe formë. Në letërsinë e Teutës ndihet realiteti, përmes personazheve që autorja i zgjedh si përfaqësues të çështjeve apo temave që kanë trazuar shoqërinë në kohërat e sotme. Tregimtarja e shfaqur herët te Kasoruho, shihet dhe te ky libër, ku historia ruan një linjë tërheqëse për lexuesin.

Daniel Pennac

“Si një roman”

Përktheu: Edmond Tupja

Botimet: “Pegi”

Çmimi: 700 lekë

Daniel Pennac-u, duke përshkruar përvojën e tij si fëmijë, prind dhe profesor, na shtyn të mendojmë për fuqinë që ka historia e një libri në vetvete dhe na kujton të drejtat tona për të lexuar çfarëdolloj gjëje, kudo e në çdo kohë, përderisa kjo na jep kënaqësi. Kjo ese përmban kështu një nga kritikat më të holla ndaj teknikave, kërkesave dhe udhëzimeve të sistemit arsimor kombëtar. Së pari, Pennac-u përshkruan mënyrën se si njihen më të vegjlit me kënaqësinë e të lexuarit. Mandej, analizon se si, me fillimin e shkollës, leximi shndërrohet në një punë angari, në një detyrim. Më pas, duke u bazuar në përvojën e tij si profesor, ai përshkruan një klasë adoleshentësh, të cilët rizbulojnë kënaqësitë e leximit, të frymëzuar në mënyrën më origjinale, por njëkohësisht edhe më të thjeshtë nga profesori i tyre.

Camilla Läckberg

“Predikuesi”

Përktheu: Taqo Trajçe

Botimet: “Dudaj”

Çmimi: 1000 lekë

Në bashkësinë peshkatare të Fjelbakës jeta është e veçuar, e qetë dhe, për disa, tragjikisht e shkurtër. Kishte pasur gjithnjë dyshime për një krim të shëmtuar pas zhdukjes së dy vajzave të reja në zonë rreth njëzet vjet më parë. Tani, një djalë i vogël, duke luajtur, e konfirmon këtë të vërtetë të tmerrshme. Zbulimi i skeleteve të tyre, bashkë me kufomën e një viktime të re, e trondit thellësisht qytetin. Detektivi vendor, Patrik Hedstrom, që pret një fëmijë nga shoqja e tij Erika, vetëm mund ta marrë me mend se çfarë do të thotë të humbasësh një fëmijë …
Gillian Flynn

“Vajza e zhdukur”
Përkthyes: Taulant Hatia
Botimet: “Bota shqiptare”

Çmimi: 1200 lekë

Një mëngjes të ngrohtë vere në North Karthëxh, Misuri, Niku dhe Emi kishin përvjetorin e pestë të martesës. Ishin bërë gati dhuratat e rezervimet, kur gruaja e bukur dhe e zgjuar e Nikut zhduket nga shtëpia e tyre buzë lumit Misisipi. Bashkëshorti Nik Djun as ia ka idenë për greminën e thepisur ku po rrëshqet falë mendjes së mprehtë të gruas së tij, por vetëm duke lexuar e kuptuar copëza nga ditari i saj, e zbulon rrezikun. Nën trysninë në rritje të policisë e mediave, si dhe të prindërve krenarë të Emit, djali i artë kalon nëpër një varg të pafundmë gënjeshtrash, mashtrimesh dhe sjelljesh të pahijshme …