Ministrja e Jashtme e Italisë, Mogherini, viziton nesër Tiranën
Ministrja e Punëve të Jashtme të Republikës së Italisë, Federica Mogherini, do të zhvillojë të premten një vizitë zyrtare në Shqipëri, në kuadër të një turneu në kryeqytetet e vendeve të Ballkanit Perëndimor (Sarajevë, Prishtinë, Shkup, Tiranë, Beograd e Podgoricë) në një prej vizitave të para që prej marrjes nga Italia të kryesimit të radhës të Këshillit të Bashkimit Evropian.
Sipas burimeve nga ambasada e Italisë në Tiranë, nëpërmjet kësaj vizite Ministrja italiane kërkon të japë një mesazh të qartë mbi rëndësinë që i kushtohet perspektivës evropiane të gjithë rajonit. Zgjerimi i Bashkimit Evropian me Ballkanin përbën në fakt një nga përparësitë e programit të presidencës italiane.
Vizita e ministres Mogherini në Shqipëri merr një rëndësi të veçantë vetëm një muaj nga dhënia e Statusit të vendit kandidat, një hap që Italia e ka mbështetur gjithnjë me vendosmëri edhe falë lidhjes së fortë mes dy vendeve.
Gjatë kryesimit të saj Italia do të vijojë të mbështesë procesin e reformave evropiane të ndërmarra nga Shqipëria.
Shefja e diplomacisë italiane nis takimet në Tiranë me homologun shqiptar Ditmir Bushati, për të vijuar me takimet me Kryeministrin, Edi Rama, Kryetarin e Kuvendit, Ilir Meta, Presidentin e Republikës, Bujar Nishani si dhe me Kreun e Partisë Demokratike, Lulzim Basha.
