Papa Françesku në vizitë zyrtare në Turqi

Papa Françesku mbërriti sot në Ankara në vizitën e parë, treditore, në Turqi, ku do të mbajë një fjalim për dialogun me islamin dhe për mbrojtjen e të krishterëve të kërcënuar nga xhihadistët në Irak dhe në Siri.

Pritur në aeroport nga ministri i Punëve të Jashtme, Mehmet Cavusoglu, papa Françesku do të takohet me presidentin islamo-konservator turk, Recep Tayyip Erdogan në pallatin e ri presidencial.

Ai do të takohet gjithashtu me kryeministrin, Ahmet Davutoglu dhe klerikun kryesor të Turqisë.

Papa Françesku do të vijojë vizitën e tij të shtunën dhe të dielën në Stamboll dhe do të vizitojë bazilikën bizantine ”Sainte-Sophie”, kthyer në një muze dhe Xhaminë Blu, ashtu si paraardhësi i tij papa Benedikti XVI në vitin 2006.