Refugjatët, Greqia priti 160 mijë persona gjatë këtij viti
Me mijëra emigrantë të tjerë shkelën në tokën greke, ndërsa ekzekutivi i shtetit helen përgatitet për bisedime mbi mënyrat sesi t’i bëhet ballë fluksit të jashtëzakonshëm të të ardhurve.
Dy anije me mbi 4200 persona u larguan gjatë natës nga ishulli Lesbos, e iu drejtuan portit të Pireut. 160 mijë janë në total të mbërriturit në Greqi deri tani, këtë vit, shifër kjo shumë më e lartë se në të gjithë 2014-n.
Athina këmbëngul se nuk ka burimet e nevojshme, që të kujdeset për kaq shumë njerëz, edhe pse grupet e ndihmës mendojnë se autoritetet greke duhet të bëjnë më shumë.
Të martën, Presidenti grek Prokopis Pavlopoulos i telefonoi homologut francez, Francois Hollande, e i kërkoi që situata e Greqisë të diskutohet në nivel të lartë europian.
Sipas rregullores së Dublinit, kërkesën për azil, refugjatët duhet ta depozitojnë në vendin e parë europian ku kanë shkelur. Por Greqia dhe Italia, portat hyrëse të emigrantëve në Europë, e kanë të pamundur të sistemojnë një numër të tillë njerëzish dhe shumë nga emigrantët drejtohen për në veri.
Në fillim të javës, Hungaria i braktisi përpjekjet për të regjistruar refugjatët e lejoi një numër të madh të tyre të merrnin nga stacioni qendror i Keletit, në Budapest, trenat që i çonin drejt Vjenës dhe jugut të Gjermanisë.
Të martën, megjithatë, stacioni u evakuua nga forcat e rendit, që lanë jashtë tij rreth 1000 emigrantë. Zemërimi i tyre u bë mëse i qartë, sidomos në orët e mbrëmjes. Duke tundur biletat e trenit për në Austri apo Gjermani, që i kanë kushtuar me qindra euro, të ardhurit kërkuan që t’i lejojnë të largohen.
Por ndryshimin, mesa duket, mund ta bëjë edhe një ditë e vetme. Qeveria e Viktor Orbanit ndryshoi qëndrim. Deklarata e fundit e saj është se do t’i regjistrojë të gjithë refugjatët dhe, ata që do të konsiderohen emigrantë ekonomikë do të dërgohen mbrapsht në shtetin nga ku kaluan kufirin për në Hungari.