Samiti i Berlinit, Rama takon homologët
Në takimin informal të Dubrovinkut mungonte vetëm Kryeministri serb
NGA ARTEMISA HOXHA
Ashtu siç kishte njoftuar ditë më parë, dje pasdite, Kryeministri Edi Rama është takuar me homologët e tij në rajon, Kryeministrin e Kroacisë, atë të Malit të Zi, si dhe me kreun e qeverisë së Bosnjë-Hercegovinës. Takimi mes katër krerëve të qeverive, që do të marrin pjesë në samitin e Berlinit më 28 gusht, u mbajt në Dubrovnik. Vetë Kryeministri Rama, nëpërmjet një fotoje të postuar në rrjetin social Twitter, ka dhënë dhe detaje në lidhje me këtë takim, i cili mbahet për një unifikim të qëndrimit të pesë vendeve të rajonit që do të jenë pjesë e samitit në Berlin. Ashtu siç shihet edhe nga fotoja e publikuar në rrjetin social Facebook, vihet re mungesa e Kryeministrit të Republikës së Serbisë, Aleksandër Vuçiç. Serbia është një nga vendet që nuk e ka pritur mirë vendimin e kancelares gjermane, Anxhela Merkel për përmbylljen e punimeve të samitit të Berlinit me kreun e qeverisë shqiptare. Referuar mediave gjermane u përfol se kreu i qeverisë së Serbisë është shprehur kundër këtij vendimi me arsyen e vetme që Kryeministri Rama nuk mund të përfaqësojë vendet e rajonit. Vende që u përfolën për kundërshtimin e vendimit të Merkelit ishin dhe Sllovenia dhe Kroacia, ndonëse Kryeministri kroat ishte dje i pranishëm në takim me Ramën. Nëpërmjet një statusi në Twitter, Rama ka njoftuar edhe përfundimin e takimit, i cili mësohet se ka zgjatur pak orë, ku Rama shkruan se është në rrugën e kthimit drejt Tiranës pas takimit, ku u unifikua pozicioni i Kroacisë, Bosnjë-Hercegovinës, Malit të Zi, Shqipërisë dhe Kosovës, në konferencën e Berlinit. “Pas takimit të Dubrovnikut, ku u unifikua pozicioni i Kroacisë, Malit të Zi e Bosnjë-Hercegovinës, Shqipërisë dhe Kosovës në Konferencën e Berlinit”, shkruan Rama në postimin e tij tw shoqwruar dhe me një foto. Në takimin e djeshëm të Dubrovnikut synohej përgatitja dhe koordinimi mes këtyre katër shteteve para samitit të Berlinit, ku kancelarja e Gjermanisë, Anxhela Merkel, ka mbledhur liderët e vendeve të Ballkanit më 28 gusht. Rama, në një postim në rrjetet sociale, më herët e cilësonte këtë takim si “kohë e re për Ballkanin”. Sipas kreut të qeverisë shqiptare, Kroacia, Mali i Zi, Bosnjë-Hercegovina, Shqipëria dhe Kosova kanë unifikuar pozicionin e tyre në lidhje me Konferencën e Berlinit që do të mbahet më 28 gusht nën drejtimin e kancelares gjermane Anxhela Merkel.
Kryediplomati Bushati: Është një takim i rajonit nën patronazhin gjerman
Kreu i diplomacisë shqiptare, Ditmir Bushati, në kuadër të samitit të Berlinit për Ballkanin që pritet të mbahet më 28 gusht, ka deklaruar se roli i veçantë i mbledhjes së kryeministrave, ministrave të Jashtëm dhe atyre të Ekonomisë në Berlin ka si qëllim forcimin e bashkëpunimit rajonal ndërmjet vendeve. “Kjo është një konferencë, e cila po organizohet nga Gjermania në lidhje me Ballkanin Perëndimor, me pjesëmarrjen e një pjese të vendeve anëtare të BE-së, vende të cilat kanë një peshë specifike në rajonin tonë. Është një takim ndërmjet rajonit dhe BE-së nën patronazhin gjerman, që synon për të stimuluar një proces për të përforcuar bashkëpunimin rajonal ndërmjet vendeve tona me synim afrimin e tyre drejt Bashkimit Europian”, ka thënë Bushati në një intervistë në “A1 Report”. Ministri i Jashtëm ka konsideruar vlerësim faktin që kancelarja gjermane Merkel ka zgjedhur Kryeministrin Rama për të mbyllur punimet e konferencës. “Shqipëria është një vend që këtë vit ka marrë statusin e vendit kandidat, dhe kjo përbën lajm në raport me vendet e tjera të rajonit. Është një vend që ka demonstruar një vullnet të qartë dhe vokacion europian për sa i përket politikës së jashtme në njehsimin e qëndrimeve me BE-në për të gjitha krizat ndërkombëtare, e sidomos për rastin e Ukrainës, dhe raportin e BE-së të tendosur disi me Rusinë. Gjithashtu Shqipëria është një spirancë stabiliteti demokratik në rajon, ku rrezen e saj të veprimit e ka përdorur në funksion të stabilitetit demokratik të rajonit dhe avancimit të rajonit, jo thjesht në procesin e integrimit europian, por me procesin e ripajtimit”, tha kryediplomati.
