Thaçi: 25 korriku 2011, ditë e bashkimit territorial të Kosovës

Kryeministri Hashim Thaçi tha  sot se, tre vite më parë, në 25 korrik 2011, u zhvillua aksioni i Njësisë Speciale të Policisë së Kosovës për të vënë nën kontroll pikat kufitare në veri të Kosovës, Jarinjë dhe Bërnjakë.

“25 korriku 2011 është ditë e bashkimit territorial të Kosovës”, theksoi Thaçi. Në këtë operacion fisnik, tha kryeministri i Kosoves, ra në krye të detyrës për mbrojtjen e integritetit territorial të Kosovës, heroi ynë Enver Zymberi.

“Ky operacion i dha fund status quo-së së mbretërimit të paligjshmërisë e pasigurisë në veri dhe nisi procesin e ri-integrimit të asaj pjese të territorit të Republikës së Kosovës. Enveri u flijua për të vendosur sovranitetin dhe ligjshmërinë në gjithë territorin e Kosovës dhe vepra e tij e lavdishme do të shërbeje si simbol frymëzimi për të gjithë ne dhe brezat që do të vijnë”, shkruan Thaçi në faqen e tij ne Facebook.

Policia e Kosovës bën të ditur se në nderim të shënimit të përvjetorit të tretë të rënies  në krye të detyrës së heroit të Kosovës Enver Zymberi, pjestar i njësive elite të Policisë së Kosovës, do të organizohen aktivitete të veçanta.