Vepra e Adem Jasharit mobilizoi gjithë popullin shqiptar

Komandanti i FSK-së, gjeneral Kadri Kastrati, bëri homazhe sot në Kompleksin Memorial “Adem Jashari” në Prekaz, ku tha se “sot në ditëlindjen e komandantit legjendar Adem Jashari po nderojmë veprën e tij dhe të familjes Jashari, vepër kjo e cila bëri kthesën dhe mobilizoi gjithë popullin shqiptar”.
Kastrati tha se “FSK-ja ka ecur rrugës për t’u bërë ushtri, e cila ka qenë ëndërr jo vetëm e komandantit Adem Jashari, por edhe e gjithë shqiptarëve”.
Ai përsëriti se vitin e ardhshëm, 7 vjetorin e FSK-së ta festojnë me një emër dhe mision të ri.
Homazhe në Prekaz kanë bërë edhe përfaqësuesit e organizatave të dala nga lufta e UCK-së. Ata thanë se është dashur një punë e madhe për të bërë një vepër të tillë si Adem Jashari.
Ndërkohë që edhe shumë qytetarë të organizuar edhe në mënyrë individuale po bëjnë homazhe dhe po vizitojnë Kompleksin Memorial ‘Adem Jashari’, për nder të festave të nëntorit.