Erdogan kritikon Obamën për heshtjen mbi vrasjen e tre studentëve mysliman

Erdogan ka kritikuar Presidentin Obama, sekretarin e Shtetit John Kerry dhe zëvendëspresidentin, Joe Biden, duke thënë se politikanët ishin përgjegjës për ngjarjen në vendin e tyre dhe duhet të mbanin një qëndrim lidhur me ngjarjen.

“Në qoftë se ju qëndroni të heshtur kur përballeni me një ngjarje të tillë, bota do të qëndrojë e heshtur ndaj jush”, tha Presidenti i Turqisë gjatë një vizite në Meksikë.

Tre studentët u qëlluan për vdekje në Chapel Hill, North Carolina.

Hetimet për këtë vrasje po vazhdojnë ende dhe deri tani është arrestuar një i dyshuar.

Presidenti i Turqisë Erdogan ka qenë gjithnjë kritik ndaj trajtimit të myslimanëve që jetojnë në shoqëritë perëndimore. Marrëdhëniet e tij me administratën e Presidentit Obama kanë ardhur gjithnjë duke u tendosur pas konfliktit në Siri dhe në Irak.

Turqia dhe Shtetet e Bashkuara janë aleatët në fushatën ndaj militantëve të Shtetit Islamik, por kanë qëndrime të kundërta në lidhje me taktikat e ndjekura në luftën ndaj militantëve.