Tahiri: Progres në konsolidimin e institucioneve qendrore në veri të vendit
Ministrja për Dialog, Edita Tahiri, deklaroi të mërkurën se është arritur progres në vendosjen dhe konsolidimin e institucioneve shtetërore në veri të vendit në shumë fusha të rëndësishme, si dhe po bëjmë përgatitje intensive për rrumbullakimin e këtij procesi.
“Si rezultat i marrëveshjeve të Brukselit, qeveria e Kosovës do të vendosë sistemin unitar shtetëror të drejtësisë në veri të vendit të munguar për shumë vite, po ashtu rreth 23 ministri dhe agjenci qendrore që kanë fushë veprimi lokale do të nisin veprimtarinë si dhe Zyrat e regjistrit civil dhe zyrat e gjendjes civile do të fillojnë punën për të pajisur qytetarët dokumentet e shtetësisë së Kosovës dhe të gjendjes civile edhe në komunat veriore”, theksoi Tahiri në njoftim për shtyp.
Ministrja për Dialog, Edita Tahiri, vlerëson se konsolidimi i institucioneve qendrore në veri të vendit të sfiduara që nga paslufta ka rëndësi vitale për shtetin e Kosovës sepse me këto procese po konsolidojmë dhe forcojmë sovranitetin shtetëror në këtë pjesë të vendit për të cilën qeveria e Kosovës është e përkushtuar dhe e vendosur plotësisht.
Ministrja për Dialog është duke e koordinuar procesin e realizimit të këtij procesi dhe përgatitjet po bëhen së bashku me gjithë institucionet kompetente si dhe dinamikat janë duke u zhvilluar në pajtim me planet për veprim, duke paralajmëruar se jemi në fazën finale dhe procesi po shkon drejt finalizimit.
Ministrja Tahiri bën të ditur se, sipas Marrëveshjes së Brukselit, 23 ministri dhe agjenci qendrore që kanë fushë veprimtari lokale, do të nisin veprimtarinë në veri të vendit shumë shpejt. Ndërkohë, procesi i integrimit të personave nga procesi i shuarjes së të ashtuquajturës “Mbrojtje civile” ka përfunduar.
Kontingjenti i fundit prej 50 persona kanë nënshkruar kontratat e punës me institucionet që i kanë integruar ata gjatë këtij muaji, në pajtim me Ligjet e Kosovës ashtu siç e përcakton marrëveshja e Brukselit. Më herët, në janar të këtij viti janë integruar 328 persona ndërsa në tetor të vitit të kaluar janë integruar 105 persona. Integrimi i këtyre personave në sistemin e Kosovës, të cilët nënshkruan kontratat e punës me institucionet e Kosovës, është një zhvillim i rëndësishëm në kuadër të objektivave të Qeverisë së Kosovës për konsolidimin e sovranitetit dhe normalizimit të gjendjes në pjesën veriore të vendit dhe integrimin e serbëve të kësaj pjese jetën publike dhe shoqërore.
“Në fushën e drejtësisë, sipas Marrëveshjes së Brukselit, do të vendoset një gjykatë themelore që do të veprojë për shtatë komunat ashtu siç përcaktohet me Ligjin për gjykatat themelore të Republikës së Kosovës si dhe një zyrë prokurorie në bazë të ligjit përkatës, ndërkohë që procesi i rekrutimit të gjyqtarëve dhe prokurorëve dhe stafit administrativ është në fazën finale dhe po realizohet nga institucionet kompetente për fushën e drejtësisë në koordinim me Ministren e Dialogut. Vendosja e sistemit unitar të drejtësisë edhe në veri të vendit ka rëndësi strategjike për konsolidimin e sovranitetit shtetëror dhe të drejtësisë për gjithë qytetarët sepse një gjë e tillë ka munguar dhe Dialogu i Brukselit po tregohet një instrument i rëndësishëm që po ndihmon Kosovën dhe qytetarët e saj për forcimin e sovranitetit shtetëror në çdo cep të vendit, ku roli i BE-së, SHBA-se, Gjermanisë është vendimtar, thekson Tahiri.
Sipas saj, një tjetër proces i rëndësishëm është ai i vendosjes së Zyrave të Regjistrit Civil dhe Zyrave të Gjendjes Civile në katër komunat veriore, të cilat së shpejti do të fillojnë t’i pajisin qytetarët e këtyre komunave me dokumentet e shtetësisë, lejet e njoftimit dhe pasaportat e shtetit të Kosovës, pastaj patentë shoferët, certifikatat e lindjes si dhe me të gjitha dokumentet tjera të gjendjes civile.
Ministrja e Dialogut së bashku me institucionet kompetente janë të angazhuara plotësisht në realizimin dhe vënien në funksion të këtyre institucioneve në dobi të qytetarëve, të cilët kanë rritur kërkesat për të marrë dokumentet shtetërore të Republikës së Kosovës, bën të ditur ministrja Tahiri.
