Në 250-vjetorin e SHBA-së, VanHorn: Marrëdhëniet Shqipëri-SHBA më të forta se kurrë

E Ngarkuara me Punë e Shteteve të Bashkuara në Shqipëri, Nancy VanHorn, vlerësoi marrëdhëniet mes Shqipërisë dhe SHBA-së si më të forta se kurrë, duke e cilësuar transformimin e vendit nga izolimi komunist drejt demokracisë dhe integrimit euroatlantik si një histori të madhe suksesi.

Gjatë pritjes zyrtare me rastin e 250-vjetorit të Pavarësisë së SHBA-së, VanHorn theksoi rëndësinë e vlerave mbi të cilat u themelua Amerika më 4 korrik 1776, duke nënvizuar se parimet e lirisë, barazisë dhe të drejtës për ndjekjen e lumturisë vazhdojnë të udhëheqin vendin edhe sot.

“Për gati dy shekuj e gjysmë, nuk ka pasur pengesë më të madhe ndaj tiranisë dhe shtypjes sesa këto fjalë të fuqishme. Për 250 vjet, Amerika ka qenë një fener shprese për njerëzit në mbarë botën që dëshirojnë të marrin frymë të lirë”, tha ajo, duke cituar edhe Presidentin Donald Trump.

VanHorn vlerësoi veçanërisht transformimin e Shqipërisë pas rënies së komunizmit.

“Shqiptarët e njohin mirë dëshirën për liri. Udhëtimi i kombit tuaj nga shtypja dhe izolimi drejt demokracisë dhe aleancës perëndimore është një nga historitë e mëdha të suksesit të kohës sonë. Ju po ndërtoni një shoqëri dhe institucione që nxisin lirinë dhe drejtësinë për të gjithë, përmes guximit dhe sakrificës”, u shpreh ajo.

Diplomatja amerikane tha se shqiptarët e njohin mirë dëshirën për liri, ndërsa vlerësoi përpjekjet e vendit për të ndërtuar institucione demokratike dhe një shoqëri më të drejtë pas rënies së regjimit komunist.

“Besimi i tyre në lirinë dhe në lidhjen e pathyeshme midis Shqipërisë dhe Shteteve të Bashkuara mbetet një frymëzim për ne të gjithë”, tha VanHorn.

Ajo theksoi se partneriteti mes dy vendeve është zgjeruar në fusha të rëndësishme si mbrojtja, tregtia dhe promovimi i vlerave demokratike.

“Lidhja jonë është sot më e fortë se kurrë më parë. Ne do të vazhdojmë të punojmë së bashku për të ruajtur një botë ku mbretëron liria, të udhëhequr nga parimet e paqes nëpërmjet forcës dhe partneriteteve të ndërtuara mbi respektin e ndërsjellë dhe interesat e përbashkëta”, deklaroi ajo.