Reforma Zgjedhore, Shoqëria Civile dhe ekspertët ndërkombëtarë “skaner” financimit të partive

Komisioni i Posaçëm Parlamentar për Realizimin e Reformës Zgjedhore ka hedhur një hap tjetër drejt transparencës financiare të subjekteve politike. Nën drejtimin e dy bashkëkryetarëve, Damian Gjiknuri dhe Oerd Bylykbashi, mbledhja e radhës u shndërrua në një tryezë të gjerë diskutimi, ku fokusi kryesor ishte projektligji i ri “Për financimin e partive politike”.

Në këtë seancë dëgjimore, Komisioni hapi dyert për organizatat e shoqërisë civile (OJF) dhe palët e konsultuara, duke kërkuar një qasje gjithëpërfshirëse për njërën prej çështjeve më sensitive të procesit zgjedhor në Shqipëri.

Për të ofruar rekomandime, komente dhe sugjerime teknike, ishin të ftuar përfaqësues nga organizata me peshë në monitorimin e proceseve demokratike si Instituti i Studimeve Politike (ISP) dhe Open Data Albania; Komisioni Qendror i Zgjedhjeve (KQZ), si organi ekzekutues i ligjit; Komiteti Shqiptar i Helsinkit dhe Shoqata për Kulturë Demokratike; partnerë ndërkombëtarë si NDI, OSBE dhe përfaqësues nga Zyra e Këshillit të Evropës.

Përfaqësuesit e shoqërisë civile parashtruan sugjerime konkrete që synojnë mbylljen e shtigjeve për financime të dyshimta dhe rritjen e llogaridhënies gjatë fushatave elektorale.

Diskutimet nuk u kufizuan vetëm te shoqëria civile. Të pranishëm ishin edhe ekspertët teknikë të partive politike, të cilët ballafaquan qëndrimet e tyre në dritën e sugjerimeve të reja. Ky proces dëgjimor konsiderohet i rëndësishëm për të siguruar një produkt ligjor që gëzon mbështetje të gjerë dhe që u përgjigjet standardeve ndërkombëtare të OSBE/ODIHR.

“Projekti final që do të miratohet nga komisioni me reflektimet e nevojshme, do t’i nënshtrohet një procesi konsulte përpara se t’i përcillet seancës plenare për miratim,” theksohet në njoftim.