Islam Dudaev me medalje ari në Taranto 2026, Rama: Ditë historike për mundjen shqiptare

Kryeministri Edi Rama ka përshëndetur suksesin historik të mundësit Islam Dudaev në Lojërat Mesdhetare Taranto 2026 që mbahet në jug të Italisë.

Përmes një postimi në rrjetet sociale, kreu i qeverisë e cilësoi arritjen si një ditë historike për mundjen shqiptare

“Islam Dudaev shkruan historinë duke fituar medaljen e artë në Lojërat Mesdhetare Taranto 2026 dhe duke i dhuruar Shqipërisë një sukses të jashtëzakonshëm në arenën ndërkombëtare. Një ditë historike për mundjen shqiptare! Një medalje që na bën të gjithëve krenarë”, shkruan Rama.

Dudaev fitoi medaljen e artë në kategorinë deri në 74 kg të stilit të lirë, duke i dhuruar Shqipërisë medaljen e parë të këtij metali në këtë edicion të Lojërave Mesdhetare.

Në finale, ai triumfoi ndaj Fati Vejselit nga Maqedonia e Veriut me rezultatin 4-0, pasi kundërshtari u tërhoq për shkak dëmtimi ndërsa Dudaev ishte në epërsi.

Paraqitja e jashtëzakonshme e mundësit shqiptar e çoi atë në majën e podiumit, duke shkruar një tjetër faqe të rëndësishme për sportin shqiptar në arenën ndërkombëtare.