Sanchez mbështet Lamine Yamal pas reagimit të Izraelit ndaj ngritjes së flamurit palestinez

Kryeministri spanjoll Pedro Sanchez ka dalë në mbështetje të futbollistit të Barcelonës, Lamine Yamal, pas kritikave nga Izraeli për ngritjen e një flamuri palestinez gjatë festimeve të fitores së ekipit në kampionat .

Në një postim në platformën X, Sanchez argumentoi se ata që besojnë se ngritja e një “flamuri shteti” është e barabartë me nxitjen e urrejtjes “ose kanë humbur gjykimin e tyre ose janë verbuar nga çnderimi i tyre”.

Deklarata e tij erdhi pas reagimit të Ministrit të Mbrojtjes të Izraelit, Israel Katz, i cili akuzoi futbollistin për “nxitje kundër Izraelit dhe kultivim të urrejtjes, ndërsa ushtarët tanë po luftojnë organizatën terroriste Hamas”.

Katz i bëri thirrje gjithashtu Barcelonës të distancohet nga veprimet në fjalë dhe ta bëjë të qartë se nuk ka vend për nxitje ose mbështetje për terrorizëm.

“Ai thjesht po shprehte solidaritet”

Sanchez, nga ana e tij, u përgjigj se futbollisti i ri “thjesht shprehu solidaritetin me Palestinën që ndiejnë miliona spanjollë”, duke shtuar se kjo është një arsye për krenari.

Përballja vjen pas tensioneve të fundit midis Spanjës dhe Izraelit, pasi Madridi ka kërkuar një rishikim të marrëveshjes së asociimit të BE-së me Izraelin, një propozim që në fund të fundit nuk u pranua nga shtetet e tjera anëtare.

18-vjeçari Yamal konsiderohet si një nga lojtarët kryesorë të ekipit kombëtar spanjoll përpara Kupës së Botës që po zhvillohet.