40% e aksidenteve rrugore, nga mosrespektimi i sinjalistikës

Ministri i Transportit dhe Infrastrukturës Edmond  Haxhinasto ka ndjekur punimet e projektit për vendosjen e sinjalistikës në aksin rrugor Vorë- Hani i Hotit, me një gjatësi 115 kilometra. Ndalesa e ministrit në Gjadër të Lezhës, ku duke folur për mediat iu bëri apel drejtuesve të automjeteve dhe kalimtarëve që të respektojnë sinjalistikën.

Pasi shifrat zyrtare tregojnë se 40 % e aksidenteve rrugore, shkaktohen nga mos respektimi i tabelave dhe sinjalistikës. Haxhinasto theksoi se qëllimi kryesor i këtij projekti është qëndrueshmëria dhe efikasiteti i investimit, duke theksuar se ky projekt do të reduktojë ndjeshëm aksidentet.

“Ky është një nga projektet e rëndësishme që Autoriteti Rrugor Shqiptar realizon këtë vit. Është një segment rreth 115 km nga Vora deri në Shkodër dhe më tej, në Hanin e Hotit. Është një investim i konsiderueshëm. Sigurisht që kërkesa jonë është që cilësia të jetë maksimale, që qëndrueshmëria e këtij investimi të jetë sa më e gjatë, me qëllim që ky investim të ketë efikasitet dhe t’i shërbejë sa më shumë rrugës, t’i shërbejë sa më shumë qytetarëve që përdorin këtë segment të rëndësishëm të rrjetit tonë rrugor”, u shpreh Haxhinasto.