Anulohet takimi Putin-Erdogan për shkak të tensioneve mes dy vendeve

Një takim mes presidentit të Rusisë, Vladimir Putin dhe atij të Turqisë, Recep Tayyip Erdogan u anulua për arsye të marrëdhënieve të tensionuara pasi aviacioni turk rrëzoi një bombardues rus muajin e kaluar, deklaroi zëdhënësi i Kremlinit.

Presidenti rus, Vladimir Putin do të priste të martën homologun e tij turk, Recep Tayyip Erdogan, në një takim dypalësh.

“Kjo nuk do të ndodhë. Nuk është planifikuar”, deklaroi zëdhënësi i Kremlinit, Dmitri Peskov, para gazetarëve, i cituar nga agjencia ruse e lajmeve, TASS.

Më 24 nëntor, aviacioni turk rrëzoi një bombardues rus pranë kufirit sirian.

Sipas palës turke avioni kishte shkelur hapësirën ajrore të Turqisë, ndërsa rusët pretendojnë se ai nuk ka hyrë asnjëherë në territor turk.