Berisha: Jemi në emergjencë kombëtare. Të shporrim klikën mafioze Rama-Meta

Ish-kryeministri dhe lideri historik i Partisë Demokratike Sali Berisha ka mbajtur një fjalim të gjatë në kuvendit kombëtar të kësaj force politike që ka nisur punimet që nga ora 11 e paradites së sotme në Pallatin e Kongreseve. Në fjalën e tij, pjesën dërrmuese të të cilës e zinte qeverisja 1-vjeçare mes Partisë Socialiste dhe Lëvizjes Socialiste për Integrim Berisha e ka cilësuar situatën në të cilën jetojnë shqiptarët nën këtë qeverisje atë të një emergjence kombëtare, ndërsa ka theksuar se detyra e çdo opozitari sot është të protestojë për të zhdukur atë që e quajti klika mafioze Rama-Meta.

“Sot shpirtrat e mbarë shqiptarëve janë tek vendimet tona me ne. Në këtë sallë vendoset fati i demokracisë, nën sulmin e egër dhe kërcënimit mafioz të klikës Rama-Meta që po zëvendëson shtetin ligjor me shtetin policor. I ka shpallur vendimet e gjykatave si letër pa vlerë linçon dhe arreston me bandat e saj demokratët dhe kundërshtarët e saj politikë. Kupola e mafies socialiste po rrënon ekonominë shqiptare”,  tha Berisha.

“Të ndalojmë revanshin është detyra jonë e vështirë. Të bëjmë opozitë me çdo formë demokratike, demokraci do të thotë protestë. Ka ardhur ora për liri, të përzëmë nga pushteti klikën më të rrezikshëm të Europës. Të kthehemi në një kështjellë qëndresë”, shtoi Berisha.