Erdogan: Jap dorëheqjen nëse akuzat e Putin vërtetohen
Presidenti turk Rexhep Taip Erdogan ka thënë se do të ishte i gatshëm të jepte dorëheqjen nga posti i tij si President, nëse do të provohej bashkëpunimi i Turqisë me Shtetin Islamik. Akuza se Turqia dhe ISIS bëjnë tregti nafte ka ardhur nga Presidenti Rus Vladimir Putin, i cili ka thënë se pas informacioneve të marra prej tij, kjo është dhe arsyeja se përse turqit rrëzuan avionin rus, javën e kaluar.
Por homologu i tij turk, ka thënë se do të japë dorëheqjen, nëse dicka e tillë vërtetohet.
“Nuk jemi aq të pandershëm sa të arrijmë deri në pikën, ku të mund të blejmë naftë kontrabandë nga terroristët. Nëse kjo akuzë do të provohej, sigurisht qoftë edhe detaji më i vogël për këtë, atëherë unë do të jepja dorëheqjen nga Presidenca. Nëse ekziston qoftë edhe një provë e vetme, atëherë kushdo që na akuzon le ta paraqesë atë. Ne sigurisht që do ta merrnim në konsideratë”, besohet të ketë thënë Erdogan, i cituar nga agjencia ruse e lajmeve “Itar Tass”.
Presidenti Erdogan kishte thënë më herët se qeveria e tij do të vepronte gjithashtu në mënyrë “të kujdesshme, të durueshme dhe jo e ndikuar emocionalisht”, përpara se të ndërmerrte masa në kundërpërgjigje të vendimit të Rusisë për t’i vendosur sanksione Turqisë.
