Gjykata Kushtetuese, miratohet raporti për kandidaturat
Në mbledhjen e Komisionit të Ligjeve është miratuar raporti për kandidaturat në Gjykatën Kushtetuese.
Brenda 30 ditëve Kuvendi i Shqipërisë do të zgjedhë dy anëtarë të Gjykatës Kushtetuese të Republikës së Shqipërisë.
Pas seancës dëgjimore të pak ditëve më parë, Komisioni i Ligjeve sot miratoi dy raportet me emrat e dërguar nga KED-ja për anëtarë të Kushtetueses për vendet vakante që u shpallën në 12.02.2018 dhe 04.03.2019, pasi anëtarët u shkarkuan nga vettingu.
Në listën e parë është Arta Vorpsi, Elsa Toska dhe Besnik Muçi, me këtë të fundit që është dekretuar nga Presidenti. Tashmë gara është mes Arta Vorpsit dhe Elsa Toskës.
Ndërkohë që në listën e dytë që Komisioni i Ligjeve i dërgoi sot Kuvendit për votim me këtë renditje janë: Arta Vorpsi, Fiona Papajorgji dhe Elsa Toska. Edhe këtu procedura është e njëjta, duhet shumicë e cilësuar në të kundërt, zgjidhet automatikisht i pari në renditje.
I vetmi që ka votuar kundër ka qënë Adriatik Alimadhi.
Deputetja e PS, Klotilda Bushka, e pranishme tha se janë bërë verifikimet për kriteret e tre kandidatëve.
Ndërkohë raportet e miratuara do të kalojnë në Kuvend në seancën plenare.
