Hoffman: Rama të shkojë në Beograd

Pas tensioneve të krijuara nga ndeshja e futbol lit, ambasadori gjerman në Tiranë, Helmut Hoffman ka këshilluar dje kryeministrin Edi Rama që të mos e anulojë vizitën në Beograd, të planifikuar më 22 tetor.

Nga ana e tij, Kryeministri i Shqipërisë, Edi Rama ka folur për herë të parë pas incidenteve të djeshme në Beograd, duke thënë se Shqipëria dhe shqiptarët do të jenë model frymëzimi për rajonin. Gjatë intervistës, në VOA, Rama tha se politika nuk duhet të ndikohet nga sporti, duke lënë kështu të kuptohet se edhe mund të shkojë në vizitën e planifikuar në Beograd.

Ndërkohë, zëdhënësja e baroneshës Catherine Ashton mendon se policia serbe u tregua profesioniste gjatë ndeshjes Serbi-Shqipëri. Në një prononcim për mediat, Maja Koçijançic theksoi se është e zhgënjyer për ndërprerjen e ndeshjes. “Policia serbe u tregua profesioniste. Jam e zhgënjyer për ndërprerjen e ndeshjes, pasi eventet sportive nuk duhet të ngatërrohen me politikën. Bashkimi Evropian nuk ka lidhje me incidentin”, – shkruan Koçijançic.