Në manifestimin qendror të mbajtur në hapësirat e Ministrisë së Mbrojtjes së Maqedonisë me rastin e shënimit të 18 Gushtit – Ditës së Armatës së Republikës së Maqedonisë (ARM), presidenti i vendit Gjorgje Ivanov, deklaroi se ARM deri më tani shumë herë ka justifikuar besimin e qytetarëve, por edhe të partnerëve të saj, gjë e cila është konfirmuar me ballafaqimin e krizës së refugjatëve dhe përmbytjet e fundit që goditën rajonin e Shkupit, raporton Anadolu Agency (AA).
Presidenti Ivanov në fjalimin e tij para të pranishmëve theksoi se duke pasur parasysh krizën e migrantëve dhe atë financiare në zonën e Shengenit, si dhe sulmet e shpeshta terroriste që thelluan krizën e sigurisë, për vendet e Ballkanit është më se e nevojshme të mbështesin njëri-tjetrin dhe jo të bllokohen.
“Sot në Evropë guximi kushton shtrenjtë dhe është një gjë e rrallë. Maqedonia tregoi se ka guxim të përballet me kërcënime. Derisa NATO dhe Bashkimi Evropian me vështirësi ballafaqohej me krizën e migrantëve dhe sigurimin e kufijve, Maqedonia tregoi se ka kapacitet të menaxhoj kërcënimet. Në këtë sprovë ARM-ja ka pasur një rol kyç dhe ende ka. Jo vetëm që ka ruajtur sovranitetin, pavarësinë dhe integritetin territorial të shtetit, por edhe përforcoi sigurinë kombëtare dhe sigurinë e qytetarëve të saj”, deklaroi presidenti Ivanov.
Ivanov theksoi se edhe në këto kushte të ndërlikuara gjeopolitike, jemi dëshmitarë të bllokimit të papërgjegjshëm për anëtarësimin e Maqedonisë në NATO. Ai shtoi se Maqedonia nuk do të dorëzohet dhe jo vetëm që do të vazhdojë të jetë e përkushtuar në integrimin euro-atlantik, por do të vazhdojë edhe me misionet paqeruajtëse, të cilat sipas tij mundësuan të vërtetojnë kapacitetet operacionale të ARM-së.
Ndërkaq, ministri i Mbrojtjes i Maqedonisë, Zoran Jolevski, deklaroi se me pjesëmarrjen disa vjeçare të ARM-së në misionet ndërkombëtare në mbështetje të paqes, Maqedonia u formua si një anëtare e përgjegjshme e komunitetit ndërkombëtar e cila siguron kontribut të rëndësishëm në ndërtimin e paqes dhe stabilitetit në botë.
“Maqedonia e sheh të ardhmen e saj të integruar në NATO dhe në Bashkimin Evropian, synim për të cilën ka mbështetje të fuqishme publike dhe konsensus të plotë politik. Vendi jonë mbetet plotësisht i angazhuar për marrjen e përgjegjësive që rrjedhin nga anëtarësimi i ardhshëm në Aleancë”, deklaroi Jolevski.
Ai duke njoftuar se edhe për vitin e ardhshëm planifikojnë të vazhdojnë me mbështetjen e ARM-së në misionet ndërkombëtare, theksoi se kjo dëshmon se Maqedoni është një vend partner i komunitetit ndërkombëtar, megjithatë siç tha ai, edhe pjesëtarët e ARM-së në këto misione përfitojnë aftësi të shkëlqyera.
Presidenti Ivanov për kontributin e dhënë për ruajtjen e sovranitetit, pavarësisë dhe integritetit territorial të vendit, i dekoroi me Dekoratën për Merita Ushtarake Batalionin e Policisë Ushtarake dhe Batalionin Inxhinierik pranë Armatës së Republikës së Maqedonisë.
Këtë vit 18 Gushti u shënua në mënyrë simbolike për shkak të ngjarjeve tragjike me përmbytjet në rajonin e Shkupit, ku humbën jetën 22 persona dhe u shkaktuan dëme të mëdha materiale. Në këtë manifestim morën pjesë ministra të Qeverisë, Kuvendit, përfaqësues të komuniteteve fetare, si dhe përfaqësues të trupit diplomatik në Maqedoni.
