Katër ministra të qeverisë ‘Rama’ dorëzojnë mandatin e deputetit

Ashtu siç ishte parashikuar, katër ministra të kabinetit të qeverisë ‘Rama’ kanë dorëzuar mandatin e deputetit. Mësohet se Ministri i Brendshëm, Saimir Tahiri, i Financave, Shkëlqim Cani, i Punëve të Jashtme, Ditmir Bushati dhe Ministri i Energjetikës Damian Gjiknuri, kanë dorëzuar sot në Kuvend kërkesat e tyre për të lënë mandatet.

Ndarja e funksioneve të ministrit dhe të deputetit ishte një premtim elektoral i socialistëve, që nisi të aplikohej në muajin dhjetor. Për të mos humbur shumicën në Kuvend, mandatet u dorëzuan në grupe.

Shtatë të parët që dorëzuan mandatet ishin Ilirjan Celibashi, Eglantina Gjermeni, Klajda Gjosha, Edmond Haxhinasto, Nasip Naço, Erjon Veliaj dhe Milena Harito. Pas zëvendësimit të tyre, radha i takoi Mimi Kodhelit, Lindita Nikollës, Arben Ahmetaj, Ilir Beqajs dhe Saimir Tahiri.

Ndërsa ministrja e Kulturës, Mirela Kumbaro dhe ai për Çështjet Vendore, Bledi Çuçi, nuk kanë një mandat parlamentar. Nuk dihet se kujt do t’i kalojnë këto mandate për t’u bërë deputet në Kuvendin e Shqipërisë sipas listës së emrave në Partinë Socialiste.