Kërcënimi i familjes nga Vladimir Gjuta, Tahiri: Nuk ndihem i kërcënuar, drejtësia të bëjë punën e saj
Ministri i Brendshëm Sajmir Tahiri ka folur sot për herë të parë për kërcënimet që ka marrë nga një person që pretendon se është Vladimir Gjuta.
Në një prononcim për mediat ai tha se nuk ndihet i kërcënuar dhe drejtësia duhet të bëjë punën e saj.
“Nuk ndihem i kërcënuar aspak. Drejtësia do të bëjë punën e vet. Unë vazhdoj detyrën pa asnjë shqetësim”, u shpreh Tahiri.
Dy ditë më parë u bë e ditur se ministri Tahiri dhe familja e tij janë marrë në mbrojtje nga Renea.
Vladimir Gjuta që dyshohet se ka dërguar mesazhin kërcënues është person i shpallur në kërkim nga Policia e Shtetit dhe Prokuroria në lidhje me disa shpërthime eksplozivi në Tiranë, përfshi edhe farmacinë e Bashkim Tahirit, babait të ministrit të Brendshëm Saimir Tahiri.
Mesazhi kërcënues i dërguar në adresë të kreut të Ministrisë së Brendshme është bërë objekt hetimi nga Prokuroria e Krimeve të rënda, ndërsa ngjarja mësohet se ka ndodhur më 9 maj 2015. Pas mbërritjes së mesazhit në telefonin e ministrit të Brendshëm, ai menjëherë ia ka kaluar policisë.
