Kerry: Sanksionet kundër Rusisë do të mbeten në fuqi për sa është e nevojshme

Sekretari amerikan i Shtetit, John Kerry deklaroi sot se sanksionet e vendosura ndaj Rusisë për arsye të krizës ukrainase duhet të mbahen në fuqi për aq kohë sa do të jetë e nevojshme, ndërsa disa vende evropiane duke përfshirë Francën synojnë heqjen e tyre.

“Kam besim në faktin se Evropa dhe SHBA-ja do të vijojnë të mbeten të bashkuara si për ruajtjen e sanksioneve për aq kohë sa do të jetë e nevojshme dhe për dhënien e asistencës së nevojshme për Ukrainën. Zgjedhja për Rusinë është e thjeshtë, të zbatojë në mënyrë të plotë marrëveshjen e Minskut për Ukrainën ose të vijojë të përballet me sanksione më të thelluara në planin ekonomik”, tha ai në konferencën për Sigurinë në Mynih.

SHBA-ja do të kontribuojë në dhënien e nevojshme të ndihmës ndaj Evropës në përballimin e krizës migratore, e cila përbën një kërcënim pothuajse ekzistencial për kontinentin, deklaroi Kerry.

“Shtetet e Bashkuara të Amerikës janë të vetëdijshëm për natyrën pothuajse ekzistenciale të këtij kërcënimi si për jetën politike dhe mbarëvajtjen e jetës sociale në Evropë”, tha ai.