Koalicioni, sulme në Siri; Damasku: Po vrasin ushtarët tanë

Një sulm ajror i kryer ndaj një kampi ushtarak ka vrarë tre ushtarë sirianë, ka deklaruar qeveria në Damask, duke fajësuar koalicionin e udhëhequr nga Shtetet e Bashkuara.

Qeveria siriane ka deklaruar se, avionët qëlluan raketa në një kamp në provincën Deir al Zour, që në masë kontrollohet nga grupi xhihadist Shteti Islamik, duke vrarë 3 ushtarë dhe plagosur 13 të tjerë.

Ministria e Jashtme siriane e dënoi sulmin duke e cilësuar një “akt flagrant agresioni”. Sipas dikasterit diplomatik sirian, 3 autoblinda, 4 automjete ushtarake dhe arsenale armësh e municionesh mbetën të shkatërruara.

Por një zëdhënës i koalicionit ka mohuar që forcat ajrore të tij të kenë kryer sulme në zonën e sipërpërmendur.

Ajo që dihet është se koalicioni ka goditur objektivat e militantëve të ISIS në Siri që prej shtatorit 2014 në mënyrë të pavarur dhe jo në koordinim me autoritetet e Damaskut.

Javën e kaluar, Mbretëria e Bashkuar vendosi t’u bashkohet sulmeve ajrore, duke zgjeruar ndërkohë edhe fushatën e saj të bombardimeve kundër ISIS në Irak.