Kombëtarja e Shqipërisë, miqësore me Turqinë më 13 nëntor

Pas përfundimit të kualifikueseve për Botërorin “Rusi 2018”, Federata Shqiptare e Futbollit ka konfirmuar edhe zyrtarisht kundërshtarin e radhës të kuqezinjve të drejtuar nga Christian Panucci, për miqësoren e nëntorit.
Kuqezinjtë do të luajnë miqësoren e 13 nëntorit përballë Turqisë në Antalia. Edhe pse janë dy data të lira për miqësore, 11 dhe 14, FSHF i është përmbajtur kërkesës së trajnerit italian Panucci, për të zhvilluar vetëm një të tillë.
Trajneri Panucci do të grumbullojë disa ditë përpara skuadrën, për të nisur përgatitjet.
Shqipëria kthehet të luajë sërish një ndeshje miqësore ndaj Turqisë, teksa për herë të fundit ishim ndeshur me ta në kualifikueset e Botërorit të vitit 2006.
Në përballjet e drejtpërdrejta mes Shqipërisë dhe Turqisë, bilanci anon në favor të turqve, me 4 fitore, 2 barazime dhe vetëm 3 fitore për kuqezinjtë.