Krasniqi pyet: Flamuri shqiptar jo në Beograd, ai serb gjithandej nëpër Kosovë?!

Ish- kryetari i Kuvendit të Kosovës, Jakup Krasniqi, i është kundërpërgjigjur ministrit të Punëve të Jashtme të Serbisë, Ivica Dacic, duke i thënë se “serbët për të gjitha të bëmat e tyre nuk e kanë pranuar fajin asnjëherë”.

Ai më përmes rrjetit social Facebook, duke iu referuar serbëve ka shkruar se “ju nuk mund ta përmbushni asnjë vlerë evropiane”.

Më poshtë e keni postimin e plotë të Krasniqit:

Daçiq: “Serbia nuk mban asnjë përgjegjësi për ndërprerjen e kësaj ndeshje”.

Po Daçiq, Serbia nuk mban përgjegjësi për shkatërrimin e Jugosllavisë! Nuk mban përgjegjësi për politikat shfarosëse të gjenocidit të ndjekura nga Serbia e Federata Jugosllave në Kosovë , nuk mban përgjegjësi për luftërat shkatërrimtare të zhvilluara në Kroaci, Bosnje e Hercegovinë dhe në Kosovë . Serbia nuk është fajtore për shovinizmin e egër që kultivohet nga udhëheqësit serb edhe sot e kësaj dite. Serbia nuk ka faj pse nuk ka kuraje ta pranoj botërisht fajin për gjenocidin e ushtruar në hapësirat e ish Jugosllavisë . Serbia, nuk ka faj për barbarinë e ushtruar mbi lojtarët shqiptar dhe jo vetëm nga huliganet e shfrenuar, por edhe nga ata që duhet t’i mbronin lojtarët e ekipit të Shqipërisë.

Sipas logjikës suaj: Flamuri i shqiptarëve dhe i Shqipërisë nuk benë të valoj mbi Beograd, ndërsa flamuri i Serbisë mund të valoj gjithandej nëpër Kosovë?!

Ju që nuk mund ta pranoni fajin e shkaktuar në një ndeshje futbolli, kur do ta pranoni fajin për gjenocidin e shkaktuar kundër të gjithë jo serbëve në hapësirat e ish Jugosllavisë? Ju nuk mund ta përmbushni asnjë vlerë evropiane.

Ne jemi të bindur se Serbia e udhëhequr nga nxënësit dhe bashkëpunëtoret e Millosheviqit, nuk mund të merr dhe as duhet të merr rrugëtimin kah integrimi në vlerat evropiane.