Laporta drejt mandatit të ri në krye të Barcelonës

Sipas sondazhit të realizuar nga mediat katalanase TV3 dhe Catalunya Ràdio, Laporta ka marrë rreth 66.6% të votave, duke siguruar një epërsi të qartë ndaj rivalit të tij, Víctor Font, i cili raportohet se ka marrë 30.9%.

Zgjedhjet presidenciale të klubit katalanas u mbajtën këtë të diel, ku mijëra anëtarë të klubit votuan për mandatin e ardhshëm pesëvjeçar të presidencës. Procesi i votimit u zhvillua kryesisht në stadiumin Spotify Camp Nou, por edhe në qendra të tjera votimi në qytete si Girona, Tarragona, Lleida dhe Andorra.

Atmosfera gjatë ditës së votimit ishte mjaft e gjallë, me pjesëmarrje të konsiderueshme të anëtarëve të klubit, gjë që pasqyron rëndësinë e këtyre zgjedhjeve për të ardhmen e Barcelonës.

Laporta, i cili më parë ka qenë president i Barcelonës dhe ka udhëhequr klubin gjatë një prej periudhave më të suksesshme në historinë e tij, pritet të marrë një mandat të ri për të vazhduar drejtimin e klubit.

Megjithëse numërimi i votave ende po vazhdon, shifrat nga sondazhet e para tregojnë për një fitore të qartë të Laportës ndaj Fontit. Rezultatet zyrtare pritet të publikohen pasi të përfundojë plotësisht procesi i numërimit të votave.