Matura Shtetërore, sot provimi i gjuhës së huaj

Njoftimi

Mbi 46 mijë maturantë do të testohen sot për provimin e parë të maturës shtetërore, përkatësisht për gjuhën e huaj, D3: Anglisht, frëngjisht, italisht dhe gjermanisht. Lajmi u bë me dije nga zëvendësministrja e Arsimit, Nora Malaj, e cila njoftoi nëpërmjet një konference për shtyp, datat kur do të zhvillohen provimet e tjera të maturës shtetërore, përfshirë edhe masat e marra nga Ministria e Arsimit, Ministria e Brendshme, Policia e Shtetit dhe Posta Shqiptare, për mbarëvajtjen normale të këtij procesi. Zëvendësministrja e Arsimit, Malaj, i siguroi maturantët se MAS ka marrë masat e nevojshme infrastrukturore, logjistike dhe mbështetëse, me qëllim garantimin e një procesi tërësisht normal dhe në përputhje me Rregulloren e Maturës Shtetërore.

“Maturantët nesër (sot) duhet të kenë me vete kartën origjinale të identitetit. Nuk lejohet mbajtja e celularëve në mjedisin e provimit. Nëse një maturant do të kapet me celular ai/ajo automatikisht do të përjashtohet nga procesi i provimit. Datat e tjera të provimeve do të jenë: 29 maj gjuha shqipe dhe letërsia; 9 qershor matematika; 19 qershor lëndët me zgjedhje. Si provimet e detyruara dhe ato me zgjedhje fillojnë në orën 10:00 dhe zgjasin 2 orë e 30 minuta.