Mbretëria e Bashkuar, zyrë për atasheun ushtarak në Tiranë

Sekretari i Shtetit për Mbrojtjen i Mbretërisë së Bashkuar, z. Michael Fallon, nëpërmjet një letre dërguar ministres së Mbrojtjes znj. Mimi Kodheli, ka konfirmuar hapjen e zyrës së atasheut ushtarak britanik në Tiranë. Zyra e atasheut ushtarak të Mbretërisë së Bashkuar, e cila pritet të hapet në gjysmën e parë të vitit të ardhshëm, do të mbulojë edhe Malin e Zi, i cili pritet të anëtarësohet së shpejti në NATO.

Në letrën e tij, sekretari Fallon vlerëson rëndësinë e rritjes së marrëdhënieve mes Mbretërisë së Bashkuar dhe Shqipërisë si një aleat i palëkundur i NATO-s dhe angazhimin e vendit tonë si kontribues në Task Forcën e Përbashkët të Gatishmërisë Shumë të Lartë Very High Readiness Joint Task Force (VJTF), e cila udhëhiqet nga Mbretëria e Bashkuar. Sekretari Fallon e konsideron Shqipërinë si një partner të rëndësishëm sa i përket edhe stërvitjeve të përbashkëta, të cilat ai i cilëson si të klasit të parë.

“Jam i bindur se atasheu ushtarak do të përforcojë marrëdhënien e ngushtë qe ne kemi në fushën e mbrojtjes, do të rrisë qëllimin për të punuar së bashku në çështje të interesit të përbashkët dhe do të forcojë bashkëpunimin e mëtejshëm mes forcave tona të armatosura”, – e mbyll letrën e tij sekretari Fallon.